Txheej Txheem Tshoob Kos 

Txheej txheem tshoob yog Hmoob poj thiab Hmoob yawm ib txog kev cai uas tau tsim nyob puag Tuam Tshoj teb. Txheej txheem raug pauv ua ntu zus raws Hmoob lub neej tsiv teb tsaws chaw. Vim li no Hmoob nyob Tuam tshoj, teb chaws Los Tsuas, Thaib Teb thiab Mem Kuj thiaj li ua tshoob ua kos tsis sib xws. Tej laus niaj txhis piv txoj lus hais tias: "Nyob luag ntuj ces yoog luag txuj." Hmoob nyob Mem Kuj tus txheej txheem tshoob thiaj li ntxiv nqe "Ob nplooj ntawv muas niam txiv ib puas txoj cai."

Yog vim li cas peb thiaj li sau ob me nplooj ntawv ntsuab tso mam li ntos tshoob kos tom qab? Tej laus cem hais tias: "Hnub no koj khob qhua vauv ob choj nyiaj. Txog hnub koj rab hneev yaj kub txeeg ntsia nrawv lawv qab taw rooj ces lawv yuav taij lawv ob choj nyiaj rov qab." Vim cov poj rhawv kab yawm rhawv kev nyob rau lub teb chaws no, lub sib hawm Hmoob tsis tau tuaj coob thiab tsis muaj cov txawj ua mej koob, tau sau thiab tau them tus nqi muas lus txeej lus xuam no lawm. Niaj hnub no tshoob kos ntsig los txog mas niam txiv hauv tsev thiaj li pheej yuav tsum ntaim kom tau lawv qhov nyiaj uas lawv tau poob rau lwm rooj tshoob rov qab los. Niam txiv tom ub yog tus yuav txhaum niam txiv hauv tsev ib tug neeg lawm ces niam txiv tom ub yuav tsum tso. Lwm hnub lwm xeem neeg ho mus nphav txog niam txiv tom ub tsev neeg ces lawv mam li sau pauj.

Txheej txheem tshoob yog Hmoob ib txog kev cai dab qhuas uas qhia tau rau lwm haiv neeg hais tias Hmoob ua tshoob ua kos muaj qib muaj quag. Txheej txheem tshoob no tus sau muab faib ua 3 feem dav xws li:

 •   Ua ntej yuav mua hais tshoob (niam txiv tom ub tsev.)

 •   Lub sib hawm ua tshoob ua kos (niam txiv tom no tsev.)

 •   Tom qab tshoob kos tiav.

Txheej txheem yog ib qho txuj ci uas kawm thiab siv yooj yim. Tab sis txheej txheem yog ib yam uas to taub nyuaj txog nws lub ntsiab. Cov Hmoob uas tsis tau paub txog tus txha txheej txheem thiaj li ke hais ke luag tias: "Ke ua ke kawm." Niam txiv kwv tij neej tsa Hmoob! Yog thaum nej paub txog tus txha txheej txheem tshoob mas yog hnub nej paub hais lo lus tsis siab txog lwm tus neeg cev nqaij daim tawv. Txog hnub nej txoj kev hlub nqis los nyob hauv lub siab lawm mas hnub no nej rua muag saib ib muag xwb mas nej yuav paub tau tias yog cov mej koob tab tom siv tus txheej txheem tshoob los sis lawv tab tom siv lawv tus cwj pwm.

Ib tug piv txwv zoo yog nyob saum lub rooj tshoob cov mej koob siv hom khob thiab cov dej caw twg los chiv zeeg cawv haus mas tus nus tij tsuas muaj cai siv hom khob thiab cov dej cawv ntawv los zeem nws tij yawm yij xwb. Yog tus nus tij siv lub khob loj tshaj lub uas cov mej koob chiv raws zeeg cawv mas tus nus tij ntawd yog ib tug neeg muaj pluaj siab xav tsim txom nws tus yawm yij kom poob ntsej muag. Tsis tag li ntawd xwb cov nus tij uas tsis zaum saum lub rooj kuj tsis muaj cai los zeem tus yawm yij. Yog cov nus tij sab nraud yog ib co neeg paub kev cai tshoob ko, lawv xav zeem tus yawm yij mas lawv yuav tsum ywj lawv tus yawm yij. Piv hais tias tus yawm yij kom tus nus tij pab haus ces tus nus tij yuav tsum tau haus kheej. Tus nus tij sab nraud tsis muaj txoj cai kom tus yawm yij pab nws. Vim tus nus tij sab nraud lub ntsiab lus uas nws zeem yog kev sib cog ua yawm yij yawm dab, tsis yog kev tsim txom kom qaug dej qaug cawv.

Niam txiv kwv tij neej tsa sawv daws! Yog nej tsuas ntsia txog txoj kev lom zem uas nej yuav tau txais lub sib hawm nej ua rau lwm tus tsis to taub tias nej tab tom ua dab tsi mas nej yuav tsis muaj hnub to taub txog tus txha lub ntsiab tseeb. Nej yuav tsum qi nej ob lub qhov muag thiab cuab pob ntseg mloog lwm tus neeg txoj kev ntshaw nyob hauv nws nruab siab mas nej thiaj li yuav paub txog hais tias kab tshoob kev kos no muaj nuj nqis npaum li cas rau peb haiv neeg Hmoob.

Lwm Qaib Ntawm Qhov Rooj 

Yog peb muaj ib tug tub mus coj tau ib tug ntxhais sab nraud los ua txij ua nkawm, raws li cov Hmoob tseem coj qub kev cai, mas niam txiv yuav tsum muab tus tub thiab tus nyab tshiab lwm qab tso mam li cia nkawd los tau rau hauv niam txiv lub tsev. Tus sau yuav qhia txog cov kwv tij Hmoob uas tseem coj txoj kev cai qub tias yuav lwm qaib li cas rau tus tub thiab tus nyab tshiab? Tus sau kuj yuav qhia txog cov Hmoob uas ho coj txoj kev cai tshiab tias ho yuav ua txawv li cas?

Raws li txoj kev cai qub, tus txiv tsev mus ntes ib tug lau qaib ciaj ciaj los lwm tus tub thiab tus nyab. Ib qho tuaj, yog tus txiv tsev tsis nyob hauv tsev los sis nws tsis txawj lwm qaib no ces nws mus thov cov kwv tij ib tug tuaj pab nws lwm. Tus txiv tsev kom tub thiab nyab los sawv nraum qhov rooj tag tig xub ntiag rau hauv tsev. Tus tub thiab tus nyab ob txhais tes sib npuab yuav tsum sib tuav rwb rawv lub sib hawm tus txiv tsev tab tom lwm qaib. Qhov no yog ib lub cim hais tias nkawd ob leeg ib tug yeej nyiam thiab txaus siab yuav ib tug tiag tiag. Tsis yog lwm leej lwm tus yuam kom nkawd sib yuav. Yog tus nyab tsis kam tuav tus tub tes mas niam thiab txiv yuav tsum paub tau tias yog tus tub yuam tus nyab los tsev xwb. Tus nyab yeej tsis tshua nyiam tus tub tag nws lub siab lub ntsws.

Tus txiv tsev tuav tus lau qaib ob txhais ko taw ua ke thiab yoj kiv ncig tus tub thiab tus nyab ob lub taub hau. Nws yoj thiab ntuas zoo li tus piv txwv nram no:

    "Vuav! Hnub no kuv lwm tub thiab nyab no kuv tsis lwm nkawd plig tub plig kiv. Kuv tsis lwm nkawd plig nyiaj plig kub. Tsis lwm plig qoob plig loo. Tsis lwm plig tsiaj plig txhuv. Hnub no kuv lwm tub thiab nyab no kuv lwm nkawd cuaj haiv mob yim haiv nkeeg, cuaj txog kev ploj yim txoj kev ntsoog, cuaj txog kev quaj yim txoj kev ntshai, cuaj txog kev plaub yim txoj kev lus, cuaj txog kev nyuaj siab yim txoj kev khwv kom mus ploj lis ntshis lawm puag zaj qho. Kuv lwm mus rau hluav taws kom hluav taws kub yaj lis ntshis ntsej tsis hnov muag tsis pom. Kuv lwm mus rau dej kom dej tshoob mus lawm puag ntuj txias teb tsaus. Txij hnub no lawm tom hauv ntej kom tub thiab nyab los ua lub neej noj sib hlub haus sib ce. Hnub no kom nkawd los ua lub neej ib nqag nto ntuj ib nploog nto ntsis, nkawd tu tub tu kiv kom los puv vaj, khwv nyiaj khwv txiaj kom los puv tsev. Tub thiab nyab ua lub neej nyob txhiab niaj tsis muaj mob, pua xyoo tsis muaj nkeeg nawj!"

Tom qab tus txiv tsev lwm qaib tag, nws muab tus lau qaib cuam sis rau nraum zoov. Tus lau qaib ya plaws quaj tsiag lias dua tom qab tsib taug lawm. Tub thiab nyab nkawd mam li sib tuav tev los hauv tsev. Niam thiab txiv hu nkawd hais tias:

    "Me tub thiab me nyab e! Neb los lawm los. Los tsev lau mog!"

Tus tub thiab nyab teb niam thiab txiv hais tias:

    "Niam thiab txiv! Wb los lawm os."

Tus tub thiaj li mus tuaj tom tag pe niam thiab txiv ob pe:

    "Niam thiab txiv lauj! Hnub no kuv ua tub txob plaub txob ntug. Neb ob tug ua niam ua txiv yuav tau txob txhawj xwb lauj mog. Kuv ua tub tso siab rau neb ob tug ua niam ua txiv nrog nta kuv rooj tshoob rooj kos kom tsheej tshoob tsheej kos, kom hnub no kuv tau poj tau sev. Kuv muaj lus ua neb ob tug ua niam ua txiv tsaug lau mog."

Niam thiab txiv teb li no:

    "Sawv lauj mog! Tsis txhob pe. Hnub no tseem muaj wb ob tug ua niam ua txiv nres nroos rau ntawm no wb yeej yuav pab koj xwb mog. Txij no lawm tod koj tau txij tau nkawm lawm ces teej qa teej num hauv lub tsev no wb ob tug laus yuav tso plhuav rau nyab neb ob leeg leg nawj. Peb tsev neeg yuav noj qab noj tsuag, yuav noj ntxov noj lig los tso plhuav rau tub thiab nyab neb xwb nawj mog."

Yog hais tias tsis muaj ib tug lau qaib ciaj ciaj tom thawj lub sib hawm yuav lwm qaib no. Tus txiv tsev yuav ua li cas? Raws li lub neej Hmoob nyob teb chaws Los Tsuas thiab Thaib Teb mas tus txiv tsev cia li mus nthos nkaus ib tug tw taws hauv qhov cub los lwm. Tus tw taws no tseem tab tom cig ciaj ncaig. Tus txiv tsev muab tus tw taws lwm ncig tus tub thiab tus nyab thiab ntuas cov lus li saum toj no tag ces nws muab tso rau ntawm tog tsev. Tus txiv tsev thiaj muab ib tshob dej los txawb rau ib sab ntawm tus tw taws. Nws cev tes mus daus cov dej hauv lub tshob los ntov rau tus tw taws. Tag ntawd ces tub thiab nyab cia li sib tuav tes los tsev xwb.

Ntawm no mus ho yuav hais txog cov Hmoob uas coj txoj kev cai tshiab lawm. Tus sau tsuas yog piav me me txog qhov txawv ntawm cov coj kev cai qub thiab kev cai tshiab xwb. Qhov txawv yog cov Hmoob uas coj txoj kev cai  tshiab (Catholic) tsuas taws ib lub teeb los sis ib tug tswm ciab tos tus tub thiab tus nyab lub sib hawm nkawd sib pus los yuav txog niam txiv lub vaj lub tsev. Thaum tub thiab nyab los txog ntawm niam txiv tsev lawm, yog tus txiv tsev twb taws tau lub teeb los sis tus tswm ciab ua ntej lawm, nkawd cia li los nqa lub teeb thiab sib tuav tes los tsev xwb. Tus txiv tsev xav ntuas ob-peb lo lus ntiab sub tawg sub ntsha, kev phem kev tsis zoo, los yeej tau. Nws ho tsis ntuas los kuj tsis ua li cas. Tus sau ntseeg tias cov xib hwb tseem tsim tsis tau muaj ib zaj nkauj paj nruag los hais tos tub thiab nyab lub sib hawm nkawd sib pus los ua txij ua nkawm.

Thov Neeg Mus Pab Fi Xov

Tus tub mus coj tau niam txiv tom ub tus ntxhais los txog hauv niam txiv pog yawg tsev. Tom qab tus txiv txiv muab tus tub thiab tus nyab lwm qab tag, nws thiaj li hu nws cov kwv tij tuaj nrog nws sab laj txog yuav nrhiav ib tug neeg mus fi xov rau tus nyab niam thiab txiv. Cov kwv tij yuav tsum nrhiav ib tug laus neeg uas twb paub los sis fi xov tshoob dua los lawm. Niam thiab txiv nrog rau cov kwv tij kuj nrhiav ib tug laus neeg ntawm lawv pab kwv tij los ua tus nres tshoob nres kos. Tus nres tshoob kos ntawm niam txiv tog tub ces yog tus noj xwm.

Tus noj xwm thiab cov kwv tij nrhiav tau ib tug neeg mus pab niam txiv fi xov lawm. Piv txwv li tias tus noj xwm thov Tooj Kaim mus pab fi xov. Tus noj xwm thiaj li rub ib lub me nyuam rooj. Nws ce ob khob cawv txawb hauv ib lub phaj tso saum lub rooj. Tus noj xwm mus rub Tooj Kaim los zaum tuaj sab ped. Tus noj xwm tsaws phaj cawv cev rau Tooj Kaim. Nws coj Tooj Kaim nkawd haus ib zeeg cawv meej. Tus noj xwm rov ce dua cawv cev rau Tooj Kaim. Tus noj xwm ua nriav lus hais li no rau nws:

    "Tooj Kaim e! (Hais nws lub npe raws nws kev txheeb ze.) Kuv tsis muaj tus lus dab tsi thiab. Kuv xav hais ib lo lus rau koj paub tias hnub no niam txiv N . . . (Hais tus niam txiv uas yuav nyab lub npe) tus tub hu ua N . . . (Hais tus tub yuav poj niam lub npe) tau mus coj niam txiv N . . . (Hais niam txiv tom ub lub npe) tus ntxhais hu ua N . . . (Hais tus nyab lub npe) los lawm. Peb cov ua niam ua txiv tsis pom qab thov dag thov zog. Yog li no kuv xav hais koj ib los yog hais tias koj tsis muaj qav muaj num tseem ceeb dab tsi ua no ces xav thov koj mus fi xov rau niam txiv tom ub kom niam txiv tom ub ho tsis txhob nrhiav tus ntxhais."

Yog hais tias Tooj Kaim tsis xyeej sib hawm no ces nws teb li nram no:

    "Kuv los kuj tsis muaj hauj lwm dab tsi thiab. Tab sis kuv tseem tshuav yam hauj lwm no yuav ua  . . . (Nws hais kiag nws qhov hauj lwm uas nws tsis khoom mus pab fi xov.) Hais txog kev sib pab mas yeej xav sib pab kawg. Yog nyob li kuv tsis txhob tshuav qhov nyuag hauj lwm no tab kaum ces kuv mam li mus pab fi xov xwb los yeej tau. Kuv ho tshuav ib qho hauj lwm yuav ua rau lub sib hawm no thiab ces nej tsis txhob xav li cas. Koj mam li ho thov lwm tus seb nws puas xyeej sib hawm mus pab koj."

Hos yog Tooj Kaim ho xyeej sib hawm no ces nws teb li no:

    "Kuv los kuj cav tsis muaj hauj lwm tseem ceeb dab tsi thiab. Qhov no ho yog kev tsa cuab tsa yim rau cov hluas ces peb cov kwv tij txiv tub yuav tau sib pab. Tshoob kos txog nej ces nej yuav vam kuv laud. Tshoob kos ho txog kuv los kuv kuj yuav vam nej thiab xwb. Nej npaj tau txhij lawm no ces kuv mam li mus pab fi xov seb niam txiv tom ub ho hais li cas."

Lub sib hawm Tooj Kaim lees mus pab fi xov lawm. Tus noj xwm thiaj li sawv mus tuaj nram qab thiab pe Tooj Kaim ob pes tias:

    "Yog li ces thov koj ua tiag pab peb cov kwv tij txiv tub ov mog."

Tooj Kaim sawv txaum yim tsa tias:

    "Sawv! Tsis txhob pe. Lo lus hais xwb tau lawm tsis txhob pe os."

Tus noj xwm thiaj li coj Tooj Kaim kab cawv. Nws rov teev cawv rau hauv ob lub khob cev rau Tooj Kaim. Nkawd rov haus ib zeeg cawv meej. Tooj Kaim thiaj li cheem tus noj xwm kom tsis txhob teev cawv ntxiv lawm:

    "N . . . (Hais tus noj xwm lub npe) e! Yuav cawv li no lawm xwb. Tsis txhob teev cawv ntxiv lawm."

Tus noj xwm teb tias:

    "Yuav ntxiv ma yuam. Dej caw tseem tshuav ntau na. Wb yuav ib zeeg ntxiv ma yuam."

Tooj Kaim cheem tas zog tias:

    "Tsis txhob teev cawv ntxiv lawm. Yuav li no lawm xwb mog."

Tus noj xwm thiaj li xaus cawv tias:

    "Yog li ses cawv tsis ntev koj laid mog, Tooj Kaim."

Meej li no ces Tooj Kaim thiaj li sawv tawm ntawm lub rooj mus zaum sab nraud nrog cov kwv tij tham pem. Tus noj xwm thiaj li ntsaig lub rooj mus cia.

Txhiaj Txheej Npaj Mus Fi Xov  

Yam nuj uas tseem ceeb tshaj thaum Hmoob siv mus fi xov mas yog ib txoj siv ceev. Hmoob poj thiab Hmoob yawm siv txoj siv ceeb los qhwv cov nyiaj tshab xo, nyiaj tus niam tus txiv, thiab nyiaj tus cov neej tsa uas tuaj nrog niam txiv sab laj lub caij tab tom thoob lub xo.

Cov niam tais yawm txiv coj nkhaus mas yeej tsis kam txais lub xo li. Nyob yav ntuj qub qab, ib txhia niam txiv tseem tees niam ib choj txiv ib choj cev rau niam thiab txiv tes tam sim hmo ntawd mas niam thiab txiv thiaj li kam txais lub xo. Cov niam txiv uas ua nyuaj li no mas yeej ntxhov ob tug tub thoob xo siab kawg nkaus. Vim hais tias nkawd tsis yog ob tug tau neeg, nkawd tsuas yog ob tug niam txiv tom ub thov dag zog tuaj pab lawv fi lub xo xwb.

Nram qab no yog cov  txhiaj txheej uas niam txiv nraug vauv yawg npaj rau ob tug thoob xo nqa mus fi xov tom niam txiv tog ntxhais tsev.

 •   Ib pob luam yeeb (12 pob me) coj mus tsab rau niam t xiv thiab kev neej kev tsa.

 •   Ob lam fwj cawv thiab plaub lub khob teev cawv.

 •   Ib txoj siv ceeb qhwv cov nyiaj fi xov.

 •   $20.00 qhwv ib lub pob rau txiv cob txheeb.

 •   $150.00 qhwv ib lub pob rau niam thiab txiv.

 •   $100.00 qhwv ib lub pob ntaus txhuv tsis paub sib faib hno rau niam hlob txiv hlob, niam ntxawm txiv ntxawm, thiab nus tij nus kwv sawv daws.

 •   $20.00 tus cov txiv ntxawm, txiv hlob, thiab nus tij uas tuaj nrog niam txiv sab laj. (ib leeg $20.00.)

Plaub nqi saum toj no tus sau tsuas sau tseg li ntawd xwb. Tam sim no niam txiv sau txawv ntawm li saum toj no lawm.

Thov Txiv Tuam Mej Koob

Tom qab tus txiv tsev muab tub thiab nyab lwm qaib tag. Ob tug tub tshab xo mus thoob lub xo tom niam txiv tog ntxhais tsev meej. Niam txiv tog ntxhais txais lub xo thiab teem sib hawm kom coj tus ntxhais mus ntsuas dej ntsuas txhuv. Tus txiv tsev thiaj li nrhiav ib tug kwv tij los sis ib tug qhua mus thov cov tub tshoob tub kos xws li txiv tuam mej koob, txiv lwm mej koob, tub phib laj, thiab niam txais ntsuab. Tus txiv tsev nrhiav plaub lub khob thiab ob lam fwj cawv rau tus neeg uas yuav mus thov tub tshoob tub kos. Raws li Hmoob txoj kev cai thov dag zog ua tshoob ua kos mas tus tub uas yuav poj niam yuav tsum nrog mus thov neeg ua tub tshoob tub kos.

Tus sau muab ob lub npe ua piv txwv xwv ib tsoom kwv tij neej tsa Hmoob thiaj li nyeem to taub yooj yim. Piv li tias niam txiv kom Txawj Pov coj tus hluas mus thov Nchaiv Tsheej ua txiv tuam mej koob. Thaum ob tug thov zog mus txog ntawm Nchaiv Tsheej tsev mas nkawv yuav tsum mus tom lub qhov rooj txuas mus. Nkawd mus khob qhov rooj thiab hu cov neeg nyob hauv tsev hais tias:

    "Nej puas nyob hauv tsev lawm os!"

Nchaiv tsheej los sis nws poj niam thiaj li los qhib qhov rooj thiab hu ob tug tuaj sab nraud tuaj tias:

    "Aus! Neb tuaj los ob tug. Los tsev os. Peb tsis caiv os. Los! Neb los tsev od."

Nkawd mus txeem rau hauv tsev. Mus zaum zoj ib pliag thiab tham pem kev noj qab nyob zoo. Txawj Pov thiaj li mus rub ib lub me nyuam rooj rau pem hauv plag. Nws rub ib lub rooj zaum rau sab qaum rooj hos ob lub rooj zaum rau nram qab rooj. Txawj Pov muab plaub lub khob cawv los txawb rau saum rooj thiab hliv cawv rau. Nws thiaj mam li mus rub Nchaiv Tsheej los zaum tuaj sab ped:

    "Dab laug Nchaiv Tsheej! Koj tsis txhob xav li cas es koj los zaum sab ped seb yuam."

Nchaiv Tsheej thiaj li teb tias:

    "Tau lawm os yawm yij. Kuv zaum ntawm no xwb los tau lawm. Koj muaj tus lus dab tsi los koj cia li hais xwb. Kuv yeej tsis xav li cas mog."

Txawj Pov rub tas zog hais tias:

    "Kav tsij hla hlo los zaum sab ped mas, dab laug. Zaum rau ped es muaj tus lus dab tsi los kuv thiaj li ho zoo hais rau koj ma."

Nchaiv Tsheej thiaj li ua siab hla los zaum rau sab pem toj:

    "Tsum los mas. Peb ib co nyuag yawm yij yawm dab xwb yog koj ho muaj lus dab tsi los cia li hais xwb kuv yeej tsis xav li cas nav."

Txawm Pov mus zaum tuaj sab nram hav. Tus hluas thiaj li hla los zaum ntawm Txawj Pov ib sab nram qab rooj. Txawj Pov thiaj li tsaws ob khob cawv rau Nchaiv Tsheej:

    "Txais ob khob cawv no seb yuam, dab laug!"

Tag ntawd nws kuj hliv ob khob cawv txawb rau ntawm nws xub ntiag phim tus zaum sab pem toj. Yog hais tias tshuav khob ntau, Txawj Pov hliv ob khob cawv txawb ntawm tus hluas xub ntiag phim nkawd thiab.

Tus zaum sab pem toj thiaj li txais nws ob khob cawv los tuav ntawm tes:

    "Kuv txais koj tes laid yuam yawm yij."

Txawj Pov coj nkawd haus ib zeeg cawv:

    "Haus cawv seb dab laug Ncaiv Tsheej. Haus cawv kom meej ib zeeg tso muaj lus dab tsi kuv mam li tham rau koj."

Nchaiv Tsheej ua txoj yig li no:

    "Tau lawm los mas. Koj muaj tus lus dab tsi ces cia li hais xwb, yawm yij. Tsis txhob muab dej muab cawv ua kev ua cai."

Ob tug yawm yij yawm dab sib yig cawv ib pliag ces nkawd thiaj li haus cawv. Nchaiv Tsheej thiaj li ua tsaug cawv:

    "Yawm yij! Ua tsaug cawv laid mog. Koj tsis cia li koj tseem yuav siv dej siv cawv muab kuv saib rau lub sam xeeb thiab. Ua tsaug laid mog. Tsam koj muaj chaw siv koj tsis pom qab muab los siv laid mog."

Txawj Pov cheem nws tus dab laug li no:

    "Dab laug e! Tsis txhob ua tsaug os. Ib pas nyuag cawv qaub yaug ncauj xwb. Tsis txhob ua tsaug lauj mog. Nkim lo tsaug qhuav xwb lauj mog."

Txawj Pov thiaj li rov hliv cawv rau hauv cov khob. Nws txawb ob khob rau ntawm nws xub ntiag thiab cev ob khob rau Nchaiv Tsheej, tus zaum tuaj sab pem toj. Thaum Nchaiv Tsheej txais ob khob cawv lawm ces Txawj Pov thiaj li ua nriav lus hais tias:

    "Wb tuaj hnub no wb kuj tsis muaj lus dab tsi thiab. Tab sis nyuag hluas no tau mus coj niam txiv N . . . (Hais niam txiv tom ub lub npe) tus ntxhais hu ua N . . . (Hais tus nyab lub npe) los lawm. Yog li no hnub tim . . . (Hais hnub yuav npaj mus ua tshoob ua kos) niam thiab txiv xav coj tus tub thiab tus nyab mus lov cwj. Hnub no wb xav tuaj thov koj mus ua txiv tuam mej koob, mus pab ntaiv hnub ntaiv hli, mus nrog laj niam laj txiv tom ub. Hnub no wb yuav tuaj khom vam koj mus nrog niam txiv tom ub ntsuam dej ntsuam txhuv. Cuag li wb yuav tuaj txob xeeb luab lim koj xwb los koj tsis txhob xav li cas. Yog hais tias koj tsis muaj qav muaj num tseem ceeb no ces thov koj ua tiag pab ua txiv tuam mej koob no mog."

Nchaiv Tsheej tsis kam lees ua txiv tuam mej koob no ces nws yuav teb zoo xws li nram qab no:

    "Yawm yij lau! Hais txog kev sib pab mas kuv yeej xav pab koj kawg. Tab sis kuv ho tseem tshuav ib txog hauj lwm tseem ceeb tab kaum . . . (Yig raws nws txoj hauj lwm ceev uas nws tsis khoom ua txiv tuam mej koob los sis nws yig raws nws txoj kev ntshai mus fim niam txiv tom ub cov neeg.) Koj txhob xav li cas. Koj mam li ho mus thov lwm tus pab koj. Peb kev sib pab tsis yog tag rau zaum no lawm. Lwm zaus kuv mam li ho ua tiag pab kom tau koj es koj tsis txhob xav li cas mog."

Thaum hais li no lawm ces Txawj Pov kuj tsis pom qab yuav thov li cas ntxiv lawm:

    "Tas kuv lub siab xav ma kuv yeej xav kom tau koj mus pab ua txiv tuam mej koob zaum no xwb ntag no. Tab sis koj ho tsis xyeej los tsis ua li cas. Cia wb mam li mus thov lwm tus seb puas tau. Hais ib lo lus li no thiab yog hais tias wb mus thov tsis tau lwm tus no ces wb rov qab los thov koj ua tiag pab xwb nawj."

Yog Nchaiv Tsheej tsis muaj hauj lwm tseem ceeb tab kaum thiab no ces nws lees ua txiv tuam mej koob:

    "Neb txawm tuaj thov txog kuv los kuv kuj tsis paub dab tsi li thiab. Ntshe kuv ho mus ua tsis tau raws li neb lub siab xav xwb laud. Peb ib co yawm yij yawm dab xwb yog neb ho tuaj vam txog kuv ces kawg yuav tau sib pab xwb. Hais txog hauj lwm mas muaj ntau yeej ua tsis tag. Qhov no yog kev tsa cuab tsa yim rau tej hluas ces peb cov laus yuav tau sib pab nta kom tsheej cuab tsheej yim xwb. Cia kuv mam li ho pab neb los tau. Txog hnub yuav sawv kev no ces neb nrhiav ib tug neeg tuaj tos kuv nawj."

Thaum Nchaiv Tsheej lees ua txiv tuam mej koob lawm ces ob tug zaum nram qab rooj thiaj li sawv tsees tuaj nram hav pe:

    "Yog li ces thov koj mog dab laug Nchaiv Tsheej. Cuag li wb yuav khom vam koj lub dag lub zog qhuav qhuav xwb los thov koj ua tiag pab thiab lauj mog."

Nchaiv Tsheej thiaj li sawv tsees mus rub ob tug pe ob sab caj npab kom sawv, tsis txhob pe:

    "Sawv! Tsis txhob pe lau mog. Peb ib co nyuag yawm yij yawm dab xwb hais lo lus xwb yeej tau lawm. Tsis tas yuav pe ua lub kev lub cai. Sawv lau mog ob tug."

Tom qab pe tag thiab rov qab los zaum txhij ncig lub rooj, Txawj Pov thiaj txhob lawv haus cawv ib zeeg. Haus cawv meej ces rov qab teev dua. Lawv rov qab haus cawv dua. Nchaiv Tsheej tsis xav haus cawv ntxiv lawm ces nws thiaj li cheem hais tias:

    "Tsum lauj yawm yij! Yuav cawv li no xwb tau lawm. Tsis teev dej caw ntxiv lawm."

Txawj Pov txhob kom haus ntxiv:

    "Ua li. Rau me ntsis ntxiv thiab ma yuam dab laug."

Nchaiv Tsheej teb tias:

    "Tau lawm, yuav li no lawm xwb os, yawm yij."

Txawj Pov thiaj li xaus cawv kiag tias:

    "Yog li ces cawv tsis ntev koj laid yuam. Kuv tsis rau cawv ntxiv rau koj lawm od mog."

Tag li no ces Txawj Pov thiab tus hluas nkawd thiaj li tawm hauv Nchaiv Tsheej tsev mus thov tus txiv lwm mej koob los sis rov los tsev.

Thov Txiv Lwm Mej Koob

Thaum Txawj Pov nkawd mus thov tau ib tug laus neeg ua tus txiv tuam mej koob lawm ces nkawd mam li mus thov tus txiv lwm mej koob. Raws li Hmoob kev cai thov neeg ua mej koob mas niam thiab txiv yuav tsum thov, tsis hais tus tuam mej koob los sis tus lwm mej koob, ib tug mej koob uas yog niam pog txiv yawg xeem neeg. Txhais hais tias ib tug mej koob mas yuav tsum yog yus cuab kwv tij ib tug. Hos ib tug no ces mam li thov tus qhua sab nraud pab. Tus sau muab piv txwv li tias Txawj Pov thiab tus hluas nkawd mus thov Zam, yog tus txiv ntxawm tus tub, ua txiv lwm mej koob. Thaum nkawd mus txog ntawm Zam tsev, nkawd chaws mus tuaj sab tom qhov rooj txuas. Txawj Pov nkawd thiaj li khob qhov rooj thiab hu cov neeg hauv tsev tias:

    "Nej puas nyob hauv tsev lawm os!"

Los sis nkawd hu tias:

    "Nej puas caiv los tsis caiv os!"

Zam txiv thiaj li los qhib qhov rooj thiab hu ob tug tuaj nraud tuaj. Piv li tias Zam txiv lub npe hu ua Nom Nyiaj. Nom Nyiaj thiaj li tsa ncauj hu nws ob tug tub hais tias:

    "Yog neb sad! Neb tuaj los ob tug hluas. Los tsev os. Kav tsij los hauv tsev. Yus ib co nyuag txiv tub xwb es tseem yuav caiv ua tus dab tsi na. Los od! Los tsev."

Txawj Pov nkawd chaws mus hauv nkawd tus txiv ntxawm lub tsev. Mus zaum zoj ib pliag thiab tham pem kev noj qab nyob zoo los sis kev ua laj ua kam. Txawj Pov thiaj li mus nrhiav thiab rub ib lub me nyuam rooj rau pem hauv plag. Nws rub ob lub rooj zaum rau sab pem qaum rooj hos ob lub rooj zaum rau nram qab rooj. Txawj Pov muab rau lub khob cawv los txawb rau saum rooj thiab hliv cawv rau. Nws thiaj mam li mus rub Zam txiv, Nom Nyiaj, los zaum tuam tuaj sab ped:

    "Txiv ntxawm Nom Nyiaj! Koj sawv los zaum sab pem no seb yuam."

Nom Nyiaj thiaj li yig hais tias:

    "Tau lawm los mas. Koj muaj tus lus dab tsi los cia li hais xwb. Peb ib co nyuag txiv tub xwb yog neb ho muaj hauj lwm tus dab tsi los cia li hais xwb. Tsis tas yuav ua kev ua cai ntau yam os."

Txawj Pov rub tas zog hais tias:

    "Kav tsij hla hlo los zaum sab ped mas. Zaum rau ped es muaj tus lus dab tsi los kuv thiaj li ho zoo hais rau koj ma."

Nom Nyiaj thiaj li ua siab hla los zaum:

    "Tsum los mas. Neb muaj lus dab tsi los cia li hais xwb yeej tau lawm."

Txawj Pov thiaj li ho mus rub Zam, tus uas yuav raug thov mus ua txiv lwm mej koob, los zaum sab pem toj npuas nws txiv, Nom Nyiaj. Txawj Pov rub kom Zam mus zaum:

    "Kwv Zam! Koj tsis txhob xav li cas. Koj hla los zaum ntawm koj txiv ib sab seb yuam. Hnub no wb tuaj no wb muaj ob lo lus yuav nrog koj tham. Koj hla los zaum pem qaum rooj ped seb yuam."

Zam ua txuj yig tias:

    "Kuv txiv zaum xwb tau lawm los mas. Neb muaj lus dab tsi ces hais rau kuv txiv xwb tau lawm."

Txawj Pov tsis yib li. Nws rub tas zog kom tau Zam los zaum rau sab ped xwb. Txog thaum kawg Zam thiaj li los zaum ntawm zam txiv ib sab. Tus hluas thiaj li hla los zaum ntawm Txawj Pov ib sab nram qab rooj. Txawj Pov thiaj li cev ob khob cawv rau Nom Nyiaj:

    "Txais ob khob cawv no seb yuam, txiv ntxawm Nom Nyiaj!"

Nom Nyiaj thiaj li txais nws ob khob cawv. Nws ua txoj yig tias:

    "Tau lawm los mas. Kuv txais koj tes laid yuam tub Txawj Pov." (Hais lub npe thiab kev txheeb.)

Txawj Pov kuj cev ob khob cawv rau Zam thiab:

    "Txais ob khob cawv no seb yuam, kwv Zam.

Zam ua txuj yig mus yig los. Tab sis thaum kawg Zam kuj ua ib siab txais ob khob cawv los txawb rau ntawm xub ntiag:

    "Kuv txais koj tes laid yuam tij laug Txawj Pov." (Hais lub npe thiab kev txheeb.)

Tag ntawd Txawj Pov kuj hliv ob khob cawv txawb rau ntawm nws xub ntiag phim ob tug zaum sab pem toj. Txawj Pov coj sawv daws haus ib zeeg cawv:

    "Haus cawv seb txiv ntxawm Nom Nyiaj thiab kwv Zam. Haus zeeg cawv no meej tso kuv muaj ob lo lus yuav nrog neb tham."

Zam thiab Zam txiv nkawd ua txoj yig tsis kam haus nkawd plaub khob cawv:

    "Tau lawm los mas. Koj muaj tus lus dab tsi ces cia li hais xwb. Tsis txhob muab dej muab cawv los ua kev ua cai."

Peb tug sib yig cawv ib pliag ces lawv thiaj li haus ib zeeg cawv. Zam nkawd ob txiv tub thiaj li ua Txawj Pov tsaug cawv li no:

    "Txawj e! Ua tsaug cawv laid mog. Koj tsis cia li koj tseem yuav siv dej siv cawv muab wb saib rau lub sam xeeb thiab. Ua tsaug laid mog."

Txawj Pov cheem li no:

    "Tsis txhob ua tsaug os. Ib pas nyuag cawv qaub yaug ncauj xwb. Tsis txhob ua tsaug lauj mog. Nkim lo tsaug qhuav xwb lauj mog."

Txawj Pov thiaj li rov hliv cawv rau hauv cov khob. Nws rov cev ob khob rau Nom Nyiaj hos ob khob rau Zam. Thaum Zam nkawd ob txiv tub txais ob khob cawv lawm ces Txawj Pov thiaj li ua nriav lus hais tias:

    "Wb tuaj no kuj tsis muaj lus dab tsi thiab. Tab sis nyuag hluas no tau mus coj niam txiv N . . . (Hais niam txiv tom ub lub npe) tus ntxhais hu ua N . . . (Hais tus nyab lub npe) los lawm. Yog li no hnub tim . . . (Hais hnub yuav npaj mus ua tshoob ua kos) niam thiab txiv xav coj tus nyab mus lov cwj. Hnub no wb xav tuaj thov kwv Zam pab ua txiv lwm mej koob, mus pab ntaiv hnub ntaiv hli, mus nrog laj niam laj txiv. Hnub no wb yuav tuaj khom vam  kwv Zam mus nrog niam txiv tom ub ntsuam dej ntsuam txhuv. Cuag li wb yuav tuaj txob xeeb luab lim neb ob txiv tub xwb los neb tsis txhob xav li cas. Yog hais tias kwv Zam ho tsis muaj qav muaj num tseem ceeb no ces wb xav thov kwv Zam ua tiag pab thiab no mog."

Zam tsis kam lees ua txiv lwm mej koob no ces nws yuav teb zoo xws li nram qab no:

    "Tij laus Txawj! Hais txog kev sib pab mas kuv yeej xav pab koj kawg. Tab sis kuv ho tseem tshuav ib txog hauj lwm tab kaum . . . (Yig raws nws txoj hauj lwm ceev uas nws tsis khoom ua txiv lwm mej koob.) Koj txhob xav li cas. Koj mam li ho mus thov lwm tus. Peb kev sib pab tsis yog tag rau zaum no lawm. Lwm zaus kuv mam li ho ua tiag pab kom tau koj es koj tsis txhob xav li cas mog."

Thaum hais li no lawm ces Txawj Pov kuj tsis pom qab yuav thov li cas ntxiv lawm:

    "Tas lub siab xav mas xav kom tau koj mus pab zaum no xwb ntag no. Tab sis koj ua kwv ho tsis xyeej los tsis ua li cas. Cia wb mam li mus thov lwm tus seb puas tau. Yog hais tias wb mus thov tsis tau lwm tus ces wb rov qab los thov koj ua tiag pab xwb nawj."

Yog Zam tsis muaj hauj lwm tseem ceeb tab kaum thiab nws lees ua txiv lwm mej koob no ces nws yuav teb zoo li no:

    "Neb txawm tuaj thov txog kuv los kuv kuj tsis paub dab tsi li thiab. Ntshe kuv ho mus ua tsis tau raws li neb lub siab xav xwb laud. Peb ib co kwv tij txiv tub xwb yog neb ho tuaj vam txog kuv ces kawg yuav tau sib pab xwb. Hais txog hauj lwm mas muaj ntau yeej ua tsis tag. Qhov no yog kev tsa cuab tsa yim rau tej hluas ces peb cov laus yuav tau sib pab nta tus hluas kom tsheej cuab tsheej yim xwb. Cia kuv mam li ho pab neb los tau. Txog hnub yuav sawv kev no ces neb nrhiav ib tug neeg tuaj tos kuv nawj."

Zam txiv hais ob nyuag lo ntxiv hais tias:

    "Nyuag hluas los kuj tsis muaj qav num tseem ceeb dab tsi thiab. Kwv tij txiv tub ces yeej tsis muaj leej twg txawj lawm. Mam li kom Zam ua tiag pab. Kwv tij yuav sib pab ces yog tej ntwb ntu no xwb ntag. Txog nej ces nej yuav vam wb ob txiv tub. Thaum ho txog wb lawm los wb kuj tso siab rau nej cov kwv tij thiab xwb."

Thaum Zam lees ua txiv lwm mej koob lawm ces ob tug zaum nram qab rooj thiaj li sawv tsees tuaj nram hav pe:

    "Yog li ces thov koj mog kwv Zam. Cuag li wb yuav khom vam koj lub dag lub zog qhuav qhuav xwb los thov koj ua tiag pab mus nrog laj niam laj txiv, mus nrog ntaiv hnub ntaiv hli thiab lauj mog."

Zam thiaj li sawv tsees mus rub ob tug pe ob sab caj npab kom sawv, tsis txhob pe:

    "Sawv! Tsis txhob pe lau mog. Peb ib co nyuag kwv tij xwb hais lo lus xwb yeej tau lawm. Tsis tas yuav pe ua kev ua cai. Sawv lau mog. Kab tshoob kev kos txog neb ces neb yuav vam txog kuv. Thaum ho txov kuv lawm los kuv kuj yuav vam nej cov kwv tij thiab xwb mog."

Nkawd kuj pe zam txiv ob pes thiab:

    "Txiv ntxawm Nom Nyiaj e! Cuag li wb yuav khom vam tus hluas lub dag lub zog qhuav qhuav xwb los thov koj tus ua txiv ho ua lub siab ntev thiab mog."

Zam t xiv kuj teb nkawd zoo xws ib yam li zam teb thiab:

    "Sawv tsis txhob pe os. Lo lus hais xwb tau lawm os. Sawv lauj mog."

Txawj Pov txhob kom sawv daws haus lawv cov cawv uas twb teev tau lawm:

    "Haus! Haus peb cov cawv kom meej seb yuam."

Thaum lawv haus cawv meej lawm ces Txawj Pov ho hliv cawv ntxiv rau hauv cov khob. Nws thiaj li coj Zam nkawd ob txiv tub haus dua ib zeeg cawv. Haus zeeg cawv no meej ces Zam thiaj li cheem Txawj Pov kom tsis txhob teev cawv ntxiv lawm:

    "Tij laug Txawj, peb yuav cawv li no lawm xwb mog. Luag hais tias noj ntau ces tsau. Haus ntau ces qaug. Koj tsis txhob teev ntxiv lawm. Koj txawm teev los wb yuav tsis haus lawm."

Txawj Pov thiaj li txhob ntxiv hais tias:

    "Ua li. Rau me ntsis ntxiv thiab ma yuam txiv ntxawm Nom Nyiaj thiab kwv Zam."

Txog thaum Zam nkawd ob txiv tub tsis kam haus lawm no ces Txawj Pov thiaj li xaus cawv zoo li no:

    "Yog li ces cawv tsis ntev neb laid yuam. Kuv tsis rau cawv ntxiv rau neb lawm od mog."

Tag li no ces Txawj Pov thiab tus hluas nkawd thiaj li tawm hauv Nom Nyiaj tsev. Nkawd mam li mus thov tus tub phib laj.

Thov Phib Laj

Piv txwv li tias Txawj Pov nkawd mus thov tus hluas ib tug phooj ywg, Yag, ua phib laj. Txawj Pov rub tau rooj thiab teev tau dej cawv rau saum lub rooj meej lawm ces nws thiaj li mus rub Yag los zaum sab pem toj.

    "Tus kwv koj tsis txhob xav li cas. Koj los zaum rau pem no tso wb muaj ob peb lo lus yuav nrog koj tham seb yuam."

Yag yig thiab tsis kam mus zaum tuaj sab pem toj:

    "Tau lawm os tij laug. Muaj dab tsi ces peb cia li tham ntawm no xwb los kuv yeej tsis xav li cas. Yus tib co nyuag phooj ywg xwb tsis txhob ua kev ua cai mog."

Txawj Pov rub tas zog:

    "Yag, koj kav tsij los zaum ma. Zaum tuaj pem ped tso, muaj lus dab tsi los wb mam li tham ma. Kav tsij hla hlo los zaum kiag los mas. Yog phooj yog ywg tiag mas yuav tsum zaum tso muaj tus lus dab tsi los mam li tham."

Yag thiaj li sawv los zaum tuaj sab pem toj. Txawj Pov thiab nyuag hluas nkawd thiaj li los zaum tuaj sab nram qab rooj. Txawj Pov tsaws ob khob cawv rau Yag:

    "Txais ob khob cawv no seb yuam kwv Yag."

Yag ncav tes tuaj txais ob khob cawv ntawm Txawj Pov tes:

    "Tau lawm los mas. Koj tseem yuav siv dej siv cawv ua kev ua cai thiab na. Lo lus hais xwb zoo kawg lawm los mas. Kuv txais koj tes laid."

Txawj Pov teb tias:

    "Kav tsij txais nkaus ntag. Tsis txhob yig yig laid. Yig yig ses tau tsawg laid."

Txawj Pov kuj teev ob khob cawv tso ntawm nws xub ntiag.  Nws teev ob khob cev rau tus hluas uas nrog nws mus thov zog. Txawj Pov thiaj li coj nkawd haus ib zeeg cawv:

    "Haus! Peb haus ib zeeg cawv tso. Haus zeeg cawv no meej tso muaj dab tsi kuv mam li tham tuaj."

Ua ntej Yag yuav haus nws ob khob cawv, nws sawv thiab txaum yim ua Txawj Pov thiab nws tus phooj ywg tsaug cawv li no:

    "Ua tsaug cawv laiv mog, Txawj Pov thiab N . . . (Hais tus hluas lub npe.) ! Neb tsis cia li. Neb tseem siv dej siv cawv muab kuv saib rau lub sam xeeb thiab. Tsam muaj chaw siv neb tsis pom qab muab siv laiv."

Haus ib zeeg cawv meej ces Txawj Pov ho ce dua ib zeeg cawv ntxiv. Txawj Pov thiaj li ua nriav lus hais rau Yag hais tias:

    "Wb tuaj no kuj tsis muaj lus dab tsi thiab. Tab sis koj nyuag phooj ywg no tau mus coj niam txiv N . . . (Hais niam txiv tom ub lub npe) tus ntxhais hu ua N . . . (Hais tus nyab lub npe) los lawm. Yog li no hnub tim . . . (Hais hnub yuav npaj mus ua tshoob ua kos) niam thiab txiv N . . . (Hais niam thiav txiv lub npe) xav coj tus nyab mus lov cwj. Hnub no wb tuaj no wb taug kev ntsoov tuaj thov koj mus pab ua phib laj. Cuag li wb yuav tuaj txob xeeb luab lim koj xwb los koj ua kwv ho tsis txhob xav li cas. Yog hais tias koj ho tsis muaj qav muaj num tseem ceeb no ces wb xav thov koj ua tiag pab ua tub phib laj no mog."

Yag tsis xyeej no ces Yag teb raws li yag txoj hauj lwm ceev:

    "Hais txog kev tsa cuab tsa yim mas peb ib co nyuag phooj ywg xwb mas peb yuav tsum tau sib pab. Hnub no neb tuaj thov txog kuv, hais txog kev sib pab ces kuv yeej yuav pab xwb. Tab sis kuv tseem muaj ib qho hauj lwm tab kaum. . ." Yag hais nws txoj hauj lwm ti tes ti taw uas nws pab tsis tau. "Neb tsis txhob xav li cas. Lwm zaum no ces kuv mam li ua tiag pab kom tau neb mog!"

Yag tsis muaj hauj lwm khuam tes khuam taw dab tsi no ces Yag thiaj li lees ua phib laj:

    "Kuv los kuj tsis muaj hauj lwm dab tsi thiab. Ua li kuv hais rau tus phooj ywg os. Txog kuv ces kuv yuav thov koj ua phib laj. Yog ho txog koj no ces kuv mam li ua koj tus phib laj. Hnub no tus phooj ywg ho yuav poj yuav sev lawm tiag ces peb yuav tau sib pab raws li cov lus tau cog tseg. Kuv tsis muaj hauj lwm khuam tes khuam taw dab tsi thiab. Kuv mam li pab ua phib laj los tau. Txog hnub ntawd no ces kuv mam li tuaj lawm tim tsev."

Yag lees ua phib laj lawm ces ob tug zaum nram qab rooj thiaj li sawv tsees tuaj nram hav pe Yag ob pes:

    "Yog li ces thov koj mog Yag. Cuag li wb yuav khom vam koj lub dag lub zog qhuav qhuav xwb los thov koj ua tiag pab thiab lauj mog."

Yag thiaj li sawv txais yim tsa ob tug li no:

    "Sawv! Tsis txhob pe lau mog. Peb ib co nyuag phooj ywg xwb tsis tas yuav pe li os. Neb hais lo lus xwb yeej tau lawm. Sawv lau mog. Sawv! Tsis txhob pe mog."

Tom qab pe tag thiab rov qab los zaum txhij ncig lub rooj, Txawj Pov thiaj txhob lawv haus cawv ib zeeg. Haus cawv meej ces Txawj Pov rov qab teev cawv dua. Lawv rov qab haus cawv dua. Thaum Yag haus txaus thiab nws tsis xav haus cawv ntxiv lawm ces nws thiaj li cheem hais tias:

    "Tsum lauj ob tug! Peb yuav dej cawv li no xwb tau lawm. Tsis teev ntxiv lawm."

Txawj Pov txhob kom haus ntxiv:

    "Ua li. Rau me ntsis ntxiv thiab ma yuam kwv Yag. Dej cawv tseem tshuav ntau ntau. Peb haus ib zeeg ntxiv tso mam li tsum ma yuam."

Txawj Pov teev kiag cawv ntxiv cev rau Yag. Yag yig tsis tau li cas ces nws thiaj li nrog nkawd haus ib zeeg cawv ntxiv. Haus zeeg cawv no meej ces Yag thiaj li rov cheem kom tsis txhob teev ntxiv lawm. Txawj Pov thiaj li xaus cawv li no:

    "Yog li ces cawv tsis ntev koj laid yuam, Yag. Kuv tsis rau cawv ntxiv rau koj lawm od mog."

Meej li no ces Txawj Pov nkawd thiaj li rov qab los tsev lawm. Txawj Pov nkawd thiaj li mus thov ib tug ntxhais kwv tij ua niam txais ntsuab.

Thov Niam Txais Ntsuab

Kev cai mus thov niam txais ntsuab los yeej zoo raws ib yam li mus thov ob tug mej koob. Ob tug uas yuav mus thov dag zog ntawd yuav tsum mus tom qhov rooj txuas mus. Nkawd chaws mus hauv tus neeg nkawd yuav thov dag zog ntawd tsev ib yam li nkawd mus cuav zos tej. Thaum txog lub sib hawm nkawd yuav thov dag zog ces nkawd mam li mus rub ib lub me nyuam rooj rau ntawm hauv plag. Rub rooj zaum rau sab ped thiab sab nrad. Muab ib co khob cawv los txawb rau saum rooj thiab teev kom puv zoo nkauj. Thaum teev tau dej caw meej lawm ces mam li mus rub tus neeg uas yuav thov dag thov zog los zaum tuaj sab pem toj.

Piv txwv li tias Txawj Pov thiab tus hluas uas yuav poj niam nkawd mus thov ib tug txiv ntxawm tus ntxhais hu ua Paj ua niam txais ntsuab. Txawj Pov rub tau rooj thiab teev tau dej cawv rau saum lub rooj meej lawm ces nws thiaj li mus rub Paj txiv los zaum tuaj sab pem toj. Ntsuab Rwg, Paj txiv, ua txoj yig tsis kam mus zaum tuaj sab pem toj:

    "Tau lawm os ob tug hluas. Neb muaj lus dab tsi ces peb cia li tham ntawm no xwb los yeej tsis xav li cas. Yus tib co nyuag txiv tub xwb tsis txhob ua kev ua cai mog. Yog neb muaj tus lus tseem ceeb dab tsi los cia li tham xwb los mas."

Txawj Pov rub Ntsuab Rwg tas zog kom mus zaum tuaj sab pem toj:

    "Txiv ntxawm Ntsuab Rwg, koj kav tsij los zaum ma. Zaum tuaj pem ped tso, muaj lus dab tsi los wb mam li tham ma. Kav tsij hla hlo los zaum kiag los mas."

Ntsuab Rwg thiaj li sawv los zaum tuaj sab pem toj. Txawj Pov thiab tus hluas los zaum tuaj sab nrad. Txawj Pov teev cawv. Nws tsaws ob khob cawv rau Ntsuab:

    "Txiv ntxawm Ntsuab Rwg, txais ob khob cawv no seb yuam."

Ntsuab Rwg ua txoj tsis kam txais ob khob cawv:

    "Tau lawm os. Koj muaj hauj lwm dab tsi ces cia li hais xwb mog, me tub."

Txawj Pov txhob tas zog kom Ntsuab Rwg txais ob khob cawv:

    "Txais nkaus ma, txiv ntxawm. Txoj kev txoj cai muaj qas ncos tseg rau ntawd. Koj txais cawv es kuv muaj lus los kuv thiaj li zoo hais rau koj."

Ntsuab Rwg thiaj li txais ob khob cawv los txawb ntawm xub ntiag:

    "Kuv txais cawv ntawm koj tes mog."

Txawj Pov teev cawv rau nws tus kheej thiab tus hluas. Nws thiaj li coj lawv haus ib zeeg cawv:

    "Txiv ntxawm Ntsuab Rwg, peb haus ib zeeg cawv tso. Muaj lus dab tsi los kuv mam li tham os."

Ua ntej Ntsuab Rwg yuav haus nws ob khob cawv, nws sawv txaum yim ua Txawj Pov thiab tus hluas tsaug cawv li no:

    "Ob tug tub e! Ua tsaug cawv lauj mog. Neb tsis cia li. Neb tseem siv dej siv cawv thiab txob xeeb neb xwb mog."

Txawj Pov thiab tus hluas thiaj li txaum yim teb hais tias:

    "Txiv ntxawm e! Txhob ua tsaug os mog. Ib pas nyuag cawv qaub tub qa xwb os. Tsis txhob ua tsaug os mog."

Haus ib zeeg cawv meej ces Txawj Pov ho ce dua ob khob cawv ntxiv rau Ntsuab Rwg. Nws kuj  teev cawv rau nws tus kheej thiab tus hluas. Txawj Pov thiaj li ua nriav lus hais rau Ntsuab Rwg hais tias:

    "Wb tuaj no kuj tsis muaj lus tseem ceeb dab tsi thiab. Tab sis nyuag hluas no tau mus coj niam txiv N . . . (Hais niam txiv tom ub lub npe) tus ntxhais hu ua N . . . (Hais tus nyab lub npe) los lawm. Yog li no hnub tim . . . (Hais hnub yuav npaj mus ua tshoob ua kos) niam thiab txiv N . . . (Hais niam thiav txiv lub npe) xav coj tus nyab mus lov cwj. Hnub no wb xav tuaj no wb xav tuaj thov koj tus ntxhais Paj mus pab ua niam txais ntsuab, mus ua tus nyab luag. Cuag li wb yuav tuaj txob xeeb luab lim tus nkauj tus muam xwb los koj ua txiv ho tsis txhob xav li cas. Koj ho nrog wb hais rau tus muam Paj thiab seb nws puas ho muaj qav muaj num tab kaum dab tsi. Yog hais tias nws ho tsis muaj qav muaj num tseem ceeb no ces wb xav thov nws ua tiag pab ua niam txais ntsuab no. Wb xav thov nws mus pab ua niam ua luag no mog."

Ntsuab rwg thiaj li teb ob tug li no:

    "Hais txog kev tsa cuab tsa yim mas peb ib co nyuag kwv tij txiv tub xwb mas peb yuav tsum tau sib pab. Ntawm kuv tus ua txiv mas kuv kuj tsis muaj lus xyeej dab tsi. Tab sis cia kuv ho hu tus ntxhais los nug ib los seb ua li tus ntxhais puas ho muaj qav muaj num tseem ceeb dab tsi. Yog hais tias nws tsis muaj hauj lwm tseem ceeb thiab no ces mam li kom nws ua tiag pab neb."

Ntsuab Rwg thiaj li hu nws tus ntxhais Paj los zaum los sis sawv ze ntawm lub rooj cawv. Nws thiaj li nug Paj ib los seb Paj puas muaj qav num tseem ceeb dab tsi:

    "Kuv hu koj los ntawm no los kuj tsis muaj tus lus tseem ceeb dab tsi. Tab sis yeeb vim nag hmo koj txiv hlob N . . . (Hais lub npe) tus tub N . . . (Hais lub npe) tau mus yuav poj niam. Nws tau coj poj niam los tsev lawm. Hnub no ob tug tub no thiaj li tuaj thov koj mus ua niam txais ntsuab, mus pab ua niam ua luag nrog saib nrog xyuas tus nyab kom tsis pub cov neeg sab nraud tuaj haub tuaj ntxias nws. Yog hais tias koj tus ua ntxhais tsis muaj hauj lwm dab tsi no ces koj ua tiag mus pab txiv hlob lawv nawj mog. Yog koj ho tsis khoom mus pab lawv no ces seb koj ho tshuav qav num tseem ceeb dab tsi no ces koj ho hais los rau kuv ua txiv. Kuv mam li hais rau ob tug kom ob tug tsis txhob tu siab. Nkawd mam li ho mus thov lwm leej lwm tus mog. Seb koj puas yuav pab tau los tsis tau no ces hais los rau kuv ua txiv tau paub mog."

Paj khoom pab thiab no ces paj tsuas teb rau nws txiv hais tias nws mam li pab. Hos yog Paj tsis khoom pab no ces nws yuav tsum tau piav seb ua li nws tseem muaj qav num dab tsi nws thiaj li pab tsis tau. Yog hais tias Paj tsis xyeej sib hawm pab no ces nkawd mam li rov qab mus sab laj thov lwm tus ntxhais. Piv li tias Paj teb rau Ntsuab Rwg hais tias Paj mam li pab. Ntsuab Rwg mam li hais rau ob tug zaum nram qab rooj li no:

    "Neb txawm tuaj thov txog tus tub tus ntxhais los nws kuj tsis paub dab tsi li thiab. Ntshe nws ho mus ua tsis tau raws li nej lub siab xav xwb laud. Kuv nug tus ntxhais lawm nws kuj tsis muaj qav muaj num tseem ceeb dab tsi. Kuv mam li kom tus ntxhais nrog pab ua niam txais ntsuab. Txog hnub ntawd no kuv tuaj kuv mam li coj tus ntxhais tuaj."

Paj lees ua niam txais ntsuab lawm ces ob tug zaum nram qab rooj thiaj li sawv tsees tuaj nram hav pe Ntsuab Rwg ob pes:

    "Yog li ces thov koj mog txiv ntxawm. Cuag li wb yuav khom vam tej nkauj tej muam lub dag lub zog qhuav qhuav xwb los thov nws ua tiag pab thiab lauj mog."

Nkawd kuj pe Paj ob pes thiab:

    "Yog li ces thov koj mog Paj. Cuag li wb yuav khom vam koj lub dag lub zog qhuav qhuav xwb los thov koj ua tiag pab thiab lauj mog."

Paj thiab Paj txiv, Ntsuab Rwg, thiaj li sawv txais yim tsa ob tug hluas li no:

    "Sawv! Tsis txhob pe lau mog. Peb ib co nyuag kwv tij txiv tub xwb hais lo lus xwb yeej tau lawm. Tsis tas yuav pe ua kev ua cai. Sawv lau mog. Sawv os mog."

Tom qab pe tag thiab rov qab los zaum txhij ncig lub rooj, Txawj Pov thiaj txhob lawv haus cawv ib zeeg. Haus cawv meej ces rov qab teev dua. Lawv rov qab haus cawv dua. Thaum Ntsuab Rwg haus txaus thiab nws tsis xav haus cawv ntxiv lawm ces nws thiaj li cheem hais tias:

    "Tsum lauj og tug hluas! Peb yuav li no xwb txaus lawm. Tsis teev dej cawv ntxiv lawm mog."

Txawj Pov txhob Ntsuab Rog kom haus ib zeeg cawv ntxiv:

    "Ua li. Rau me ntsis ntxiv thiab ma yuam txiv ntxawm. Dej cawv tseem tshuav ntau peb haus ib zeeg ntxiv tso mam li tsum ma yuam."

Lawv thiaj li rov haus ib zeeg ntxiv. Ntsuab Rwg thiaj li rov cheem kom tsis txhob teev ntxiv lawm. Txawj Pov thiaj li xaus cawv li no:

    "Yog li ces cawv tsis ntev koj laid yuam txiv ntxawm Ntsuab Rwg. Kuv tsis rau cawv ntxiv rau koj lawm od mog."

Ntsuab Rwg nkawd thov tau Paj ua niam txais ntsuab lawm ces nkawd thiaj li rov qab los tsev lawm.

Hu Tub Nyab Plig

Puv peb tag kis ces niam thiab txiv tua ib tug npua kaum ob taus hu tub thiab nyab plig. Nkawd hu tag cov kwv tij neej tsa kom tuaj pab khi ib leeg ob txog hlua rau nkawd tus tub thiab tus nyab tes. Lub ntsiab lus yog niam thiab txiv xav kom ib tsoom niam txiv kwv tij neej tsa tuaj txhawb koob hmoov, ntawv noj ntawv huas, ntawv txij ntawv nkawm, thiab ntawv tub ntawv kiv rau ob tug niam txiv hluas tshiab.

Hmoob lub neej nyob rau teb chaws no vam meej zog qub teb chaws Los Tsuas lawm, tsim nyog niam thiab txiv yuav tsum ua cov ntxuag kom qab rau ib tsoom niam txiv kwv tij neej tsa noj. Peb tsis txhob coj lub neej zoo li Hmoob tseem nyob teb chaws Thaib thiab teb chaws Los Tsuas. Tus txiv tuam mej koob tuaj ua tiav ib rooj tshoob tsis tau ib taig zoo ntxuag noj. Qhov uas cov mej koob ntseeg tias tsim nyog lawv lub dag lub zog mus pab niam txiv laj tshoob laj kos ib zaug ces tsuas yog ob tug nyuag qaib noj sus tom kev. Dua li ntawd ces noj nqaij rog thiab haus cawv tsau plab xwb.

Cov kwv tij sib pab ua tau zaub mov thiab ntxuag siav ces lawv sib pab rub rooj rau mov. Txawb khub qaib hu plig rau hauv ib lub phaj tso rau nruab nrab saum rooj. Tso cov xov paj khi tes tuaj saum ob tug qaib. Txhos ob tug tswm ciab rau ntawm ob tug qaib ob sab. Zes hluav taws rau ob tug tswm ciab kom cig kaj ntuas. Txawb ob rev paj ntshua nplaim nplooj liab rau saum rooj. Teev ib khob dej txiag tso ib sab nraum lub phaj txawb qaib. Khob dej no yuav siv ntov tub thiab nyab vij sub vij sw pov tseg nraum zoov. Rub kwv tij neej tsa los zaum tsum kom puv. Niam thiab txiv rub tus hu plig zaum tuaj sab pem toj nrog rau ob tug laus neeg.

Ib tug kwv tij sawv niam txiv cev thiaj li teev ob khob cawv rau hauv ib lub phaj tsaws rau tus hu plig. Nws kuj tsaws ib leeg ob khob rau ob tug laus neeg uas zaum ntawm tus hu plig ib sab. Tus kwv tij ntawd thiaj li ua nriav lus hais rau tus hu plig li no:

    "N . . . e! (Hais nws kev txheeb thiab lub npe) Hnub no niam thiab txiv khom vam koj tuaj hu tub thiab nyab plig. Tav no niam thiab txiv khom vam koj los cheb tub thiab nyab vij sub vij sw kom mus lawm hnub coog hli kawg. Niam thiab txiv kuj khom vam koj los tsav koob tsav hmoov rau tub thiab nyab kom los ua lub neej cheb niam txiv plaj tse qawj ntxuav niam txiv qab yiag to. Kom tub thiab nyab los ua lub neej nyob yaj los kib txoob, ib nqag kom nto ntuj ib nploog kom nto ntsis. Kuv muaj lus ua koj tsaug mog N . . . cuag li yuav khom vam koj lub dag lub zog lauj mog!"

Tus hu plig thiaj li kom tub thiab nyab los sawv ua ib txig tuaj nram qab rooj, tig xub ntiag tuaj fim tus hu plig. Tus hu plig thiaj muab cov xov paj los cheb tus tub thiab nyab raws li nws cov txuj ci. Tom qab tus hu plig cheb tub thiab nyab vij sub vij sw tag. Nws thiaj li muab cov xov paj feeb rau kwv tij neej tsa zaum saum rooj sab ped thiab sab nrad thiab cov sawv sab nraud khi tub thiab nyab plig. Ib tug piv txwv lus hais thaum tab tom khi tub thiab nyab plig:

    "Hnub no neb ntawv nyiaj keeb puaj txwm ntaug los sib puag. Hnub no peb sawv daws muab ob txog xov paj dawb no khi neb tes los ua txij ua nkawm. Kuv khi no kuv txhawb neb plig nyiaj plig kub kom los nyob ua ke luag lis ntxhub. Kuv khi no kuv khi neb plig tub plig kiv kom xyoo tom ntej no mas neb tau ib tug me tub luag lis ntxhi no nawj. Neb mus laj fab los kom neb nco ntsoov tuav tes rawv, mus toob fab los kom neb ua ke nraim zwb zawv. Hnub no lawm tod kom neb tu tau ob leeg tub ob leeg ntxhais lov nyob puv vaj puv t sev. Neb khwv nyiaj txiag kom txaus pub kwv tij neej tsa. Xav tau yam twg mas coj ncaj ces yeej yuav tsum tau xwb lauj mog."

Khi tes tag ces tus sawv cev niam txiv thiaj li tsaws cawv thov kom ob tug laus neeg zaum ntawm tus hu plig ib sab pab saib ko taw qaib. Tom qab saib ko taw qaib meej ces txog lub caij chiv cawv haus thiab tsa kwv tij neej tsa noj mov thiab khaws ntxuag. Ob tug zaum ntawm hauv paus rooj thiaj li chiv ib tug cawv tuaj rau sawv daws haus:

    "Zoo siab thiab ua tsaug ib tsoom niam txiv kwv tij neej tsa uas tuaj koom niam thiab txiv N . . . (Hais niam thiab txiv hauv tsev lub npe) rooj mov hu plig khi tes thiab tsa mej koob sawv kev. Rooj mov hnub no ua tau raug ntsej raug muag tsis raws nej sawv daws lub siab xav los thov nej ua lub siab ntev nyob koom kom wb tus cawv tsa mej koob sawv kev cob meej xeeb kum tso. Nej cov muaj qav muaj num ua nej mam li mus leg nej lub teej qa teej num. Ntawm no mus wb yuav chiv ib tug cawv hu tub thiab nyab plig tuaj pub rau ib tsoom niam txiv kwv tij neej tsa sawv daws haus. Txoj cai nyob saum lub rooj no wb yog ob tug tswj. Nej cov niam cov txiv kwv tij neej tsa tus nyiam haus dej cawv, dej qab zib los wb tso plhuav rau nej xaiv. Nej txawm haus yam dej cawv twg los thov lwm hnub nej tsis txhob tu siab rau wb xwb. Thov kom nej haus kom muaj khub thiab raws seem tes ces zoo nkauj kawg lawm. Yog leej twg haus tsis muaj khub thiab tsis raws seem tes no ces wb muab ib khob, yog cov khob siv nyob saum lub rooj no, ntxiv rau nws. Wb yuav tsis pub tus raug nplua dej cawv ua wb tsaug. Yog li no wb chiv tus cawv hu plig tuaj kom cob meej xeeb kum rau neb ob tug tub tsawb cawv tom ko nawj. Tus cawv tuaj txog tom neb no ces neb haus kom meej thov rov khob qhuav los rau wb."

Ua ntej tus chiv cawv yuav haus nws ob khob cawv nws hais rau tus zaum txuas ntawm nws ib sab tias:

    "Kuv haus tus cawv hu plig no los rau koj nawj."

Tus zaum ntawm ib sab thiaj li teb tias:

    "Ua li lod. Kav tsij haus los lau."

Kev cai haus cawv mas yuav tsum siv sab tes pem hauv ntej haus lub khob txawb pem hauv ntej kom meej tso mam li haus khob uas txawb tom qab. Thaum teev cawv los kuj ua tib yam. Siv sab tes nram qab teev lub khob pem hauv ntej kom puv tso mam li teev lub khob nram qab. Thaum zeeg cawv mus txog tom tw rooj, mus txog ntawm ob tug tub tsawb cawv. Ob tug tub tsawb cawv thiaj li ceeb toom rau ob tug chiv cawv tias:

    "Neb tus cawv hu plig los txog ntawm wb no lawm. Ua li neb yuav kom wb tsawb los kom wb cob rau tom no os?"

Ob tug tuaj tom hauv paus  thiaj li teb tias:

    "Neb haus kom meej ob khob ntawm ko es rov lub phaj  thiab ob lub khob qhuav rov qab los rau wb. Wb yuav chiv dua ib tug tshiab tuaj pub ntxiv rau sawv daws haus. Thaum txog lub luag tsawb cawv lawm no ces wb mam li hais qhia rau neb paub os."

Haus tus cawv hu plig cob meej xeeb kum ces ob tug tub chiv cawv thiaj li chiv tus cawv khi tes rau ib tsoom niam txiv kwv tij neej tsa haus. Thaum tus cawv khi tes meej thiab cov kwv tij neej tsa noj mov tsau lawm ces niam thiab txiv thiaj li txib cov hluas los ntsaig tsum mov. Cov hluas mam li rau dua ib co ntxuag rau saum lub rooj. Nyob saum lub rooj tsuas muaj phaj thiab diav tsuab txwv.

Txuas mus rau nqe cob hauj lwm rau tub tshoob tub kos.

Cob Hauj Lwm Rau Tub Tshoob Tub Kos

Cov lus cob hauj lwm thiab ua tsaug nyob rau suam no yog tus noj xwm txoj hauj lwm. Thaum cov hluas rau tau zaub mov txhij thiab txhib cov tub tshoob tub kos nrog rau kwv tij neej tsa los zaum txhij. Sawv daws noj mov tsau. Tus noj xwm txhib cov hluas ntsaig tsum mov thiab kom lawv rau dua ib tsum mov muaj ib co phaj ntxuag rau saud nrog cov diav tsuab txwv. Tus noj xwm rov qab rub cov tub tshoob tub kos thiab cov kwv tij neej tsa kom lawv rov qab los zaum kom txhij li qub.

Ob tug tub chiv cawv thiaj li pib chiv tus cawv nkaw lus tuaj rau sawv daws haus:

    "Ntawm no mus wb yuav chiv ib tug me cawv piam sam tuaj rau nej sawv daws haus. Wb chiv wb tus cawv no tuaj lawm, niam txiv los sis tus noj xwm muaj hauj lwm li cas no ces lawv mam li los cob hauj lwm rau nej cov tub tshoob tub kos. Wb haus tus cawv piam sam no tuaj cob meej xeeb kum rau neb ob tug tub tsawb cawv tom ko nawj."

Ob tug tuaj tom tw rooj txais lus tias:

    "Wb hnov lawm os. Neb kav tsij haus tuaj. Niam txiv thiaj li zoo cob hauj lwm rau txiv tuam mej koob thiaj txiv lwm mej koob."

Ob tug tub chiv cawv thiaj li chiv nkawd tus cawv rau sawv daws haus.

Thaum tus cawv nkaw lus los dhau cov tub tshoob tub kos lawm, tus noj xwm thiaj nrhiav ib co khob thiab ib co cawv los tso rau nram qab rooj. Tus noj xwm mam li hliv cawv txawb rau hauv phaj thiab cev rau cov tub tshoob tub kos thiab tus mus sawv cev ua niam txiv ib leeg ob khob cawv. (Txuas ntxiv Lus hais rau txiv tuam mej koob)

Raws li Hmoob txoj kev cai thov dag thov zog, niaj hnub no Hmoob teev ob khob npias txawb rau hauv ib lub phaj cev rau tus tub tshoob tub kos. Lub ntsiab lus yog tus noj xwm nplij kom cov tub tshoob tub kos ua lub siab ntuj ntev nrog niam thiab txiv nta tshoob nta kos kom ntseg log puav tam ncej txawb. Kom mus ua tsheej tshoob tsheej kos, kom niam txiv tau tub tau nyab. Ib qho ntxiv, niam thiab txiv xav kom ob tug mej koob nrog niam txiv txuag nyiaj txiag. Kev txuag nyiaj txiag yog ob tug mej koob tsis txhob lam tau lam hais lus li ub li no kom niam txiv tom ub nplua nyiaj txiag rau niam txiv them.

Tej laus niaj txhis piv txoj lus tias: Poj tsis taus poj yuav yuav nyab, yawm tsis taus yawm yuav yuav nees. Txoj kev uas poj yuav tau ib tug nyab zoo los sis yawm yuav tau ib tug txiv nees heev yog los ntawm poj thiab yawm lub neej yav tag los nkawd txoj kev pauv dag pauv zog. Piv li tias thaum tshoob kos txog yus cov kwv tij neej tsa yus tsis mus pab luag. Txog hnub yus muaj tub yuav nyab los sis muaj ntxhais quas, ib tsoom kwv tij neej tsa Hmoob sawv daws yuav tsis tuaj nrog yus txheem ib tug ceg rooj.

Kev thov dag thov zog yog ib txoj kev sib pab zoo tshaj nyob hauv Hmoob lub neej yav ntuj qub qab los txog niaj hnub nyem no. Vim ua lub neej nyob ib leeg muaj ib daig zeb lag nplua, Hmoob yuav tsum tau sib pauv dag pauv zog. Kev pauv dag zog txhawb nqa Hmoob lub hwj chim kom muaj kev cia siab thiab kev sib hlub ib ncig ntawm yus pab kwv tij neej tsa.

Muab piv li tias tus tij laug txib kom tus kwv tuaj nrog nws tua qaib tua npua (ua neeb) ua ib pluag noj, tus kwv yuav tsum tso nws txoj qav num tseg thiab lauj num zias mus pab nws tus tij laug saib neeb. Txog hnub tus kwv hu nws tus tij laug kom tuaj koom nws rooj mov ua kev zoo siab rau nws tus me nyuam yug los tshiab, tus tij laug yeej yuav txaus siab tuaj koom tus kwv. Tus tij laug kuj txaus siab nrog tus kwv teev ntuj thiab qi muag thov Vaj Tswv foom koob hmoov rau tus me nyuam yug los tshiab.

Cob Hauj Lwm Rau Txiv Tuam Mej Koob

Thaum tus niam txais ntsuab thiab tus nyab hnav tau khaub ncaws Hmoob txhij. Cov kwv tij neej tsa thiab cov tub tshoob tub kos noj mov tsau lawm. Ob tug tub chiv cawv twb chiv tus cawv piam sam los rau ib tsoom niam txiv kwv tij neej tsa tab tom haus. Tus noj xwm thiaj li los muab lus ua tsaug thiab lus cob hauj lwm rau ob tug mej koob, phib laj thiab niam txais ntsuab. Tus noj xwm ce cawv rau cov tub tshoob tub kos ib leeg ob khob. Tus noj xwm tsaws ib lub phaj uas muaj ob khob cawv nyob hauv rau txiv tuam mej koob tias:

    "Txiv tuam mej koob e! Txais ob khob cawv no saib yuam."

Txiv tuam mej koob ncav nws ob txhais tes los txaislub phaj cawv. Nws teb tus noj xwm hais tias:

    "Tau lawm los mas N. . . (Hais tus noj xwm lub npe.) Koj muaj tus lus dab tsi ces cia li hais xwb los mas. Kuv txais cawv ntawm koj tes laid yuam."

Txiv tuam mej koob txais ob khob cawv los tuav ntawm tes los sis txawb tso rau saum rooj ntawm nws xub ntiag lawm. Tus noj xwm thiaj li ua nriav lus hais rau txiv tuam mej koob li no:

    "Txiv tuam mej koob e! Khwv koj lauj mog. Tav nov tus hluas yuav txob plaub txob ntug. Peb cov ua niam ua txiv yuav khom vam koj mus nrog ntaiv hnub ntaiv hli, mus laj niam laj txiv tom ub. Cuag li peb cov ua niam ua txiv yuav khom vam koj lub dag lub zog qhuav qhuav xwb lauj mog. Peb twb npaj tsis muaj zoo kab phaj rawg ntxuag rau koj khaws, tsis muaj zoo ib pib deg pib cawv rau koj haus. Koj ua lub siab ntuj ntev mus nrog pab laj naim laj txiv lauj mog. Tus rauj qws ces yuav raug rau saum koj laud! Tus roj ntshav ces cia raug rau saum peb cov ua niam ua txiv. Niam txiv tom ub txawm hais lus nkhib lus nkhaus los cia raug rau peb cov ua niam ua txiv xwb lauj mog."

Tus noj xwm hais li no tas ces nws coj cov hluas pe txiv tuam mej koob ob pes. Cov hluas sawv daws pe txiv tuam mej koob thiab hais ntxiv li no:

    "Muaj lus ua koj tsaug mog, txiv tuam mej koob e! Koj ua tiag ua lub siab ntuj ntev mus nrog ntaiv hnub ntaiv hli, mus pab laj niam laj txiv lauj mog."

Txiv tuam mej koob thiaj li sawv txaum yim tsa tus noj xwm thiab cov hluas li no:

    "Sawv lauj mog, tsis txhob pe lauj mog! Nej cov ua niam ua txiv khom vam kuv mus nrog nej ntaiv hlub ntaiv hli thiab mus laj niam laj txiv los kuv kuj paub tsis txhij tsis txhua thiab. Kuv los kuj tseem yuav khom vam nej cov ua niam ua txiv ho mus nrog saib nrog xyuas thiab. Tus rauj qws txawm yuav raug rau saum kuv los tus roj ntsha ces yuav raug rau saum nej cov ua niam ua txiv xwb lauj mog. Sawv tsis txhob pe mog."

Sawv daws pe txiv tuammej koob tag. Tus noj xwm ho tsaws ob khob cawv rau hauv ib lub phaj cev rau txiv lwm mej koob.

Cob Hauj Lwm Rau Txiv Lwm Mej Koob

Tus noj xwm tsaws ob khob cawv nyob hauv ib lub phaj cev rau txiv lwm mej koob. Tus noj xwm tig los hais rau txiv lwm mej koob tias:

    "Txiv lwm mej koob e! Txais ob khob cawv no saib yuam."

Txiv lwm mej koob ncav nws ob sab tes los txais ob khob cawv. Nws teb tus noj xwm li no:

    "Tau lawm los mas. Tsis txhob muab dej muab cawv ua kev ua cai lauj mog! Koj muaj tus lus dab tsi ces cia li hais xwb los mas. Yog li ces kuv txais cawv ntawm koj tes laiv yuam."

Thaum txiv lwm mej koob txais ob khob cawv los tuav ntawm tes los sis txawb tso rau saum rooj lawm. Tus noj xwm thiaj li ua nriav lus hais rau txiv lwm mej koob li no:

    "Txiv lwm mej koob e! Khwv koj lauj mog. Tav nov tus hluas yuav txob plaub txob ntug. Peb cov ua niam ua txiv, ua kwv ua tij yuav khom vam koj mus nrog coj tus hluas mus ntaiv hnub ntaiv hli, mus laj niam laj txiv tom ub. Cuag li peb yuav vam koj lub dag lub zog qhuav qhuav xwb lauj mog. Peb cov ua niam ua txiv twb npaj tsis muaj zoo kab phaj rawg ntxuag rau koj khaws. Peb twb npaj tsis muaj zoo ib pib dej pib cawv rau koj haus. Koj ho ua lub siab ntuj ntev mus nrog pab laj naim laj txiv lauj mog. Tus rauj qws ces yuav raug rau saum koj txiv lwm mej koob laud! Tab sis, tus roj ntshav ces cia raug rau saum peb cov ua niam ua txiv. Niam txiv tom ub txawm hais lo sib lo hnyav los cia raug rau peb cov ua niam ua txiv ua kwv ua tij xwb lauj mog."

Tus noj xwm hais li no tas ces nws coj cov hluas pe txiv lwm mej koob ob pes. Cov hluas thiab tus noj xwm thiaj li pe thiab hais ntxiv li no:

    "Muaj lus ua koj tsaug mog, txiv lwm mej koob e! Koj ua tiag ua lub siab ntuj ntev mus nrog ntaiv hnub ntaiv hli, mus nrog laj niam laj txiv lauj mog."

Txiv lwm mej koob thiaj li sawv txaum yim tsa tus noj xwm thiab cov hluas li no:

    "Sawv lauj mog, tsis txhob pe lauj mog! Nej cov ua niam ua txiv ua kwv ua tij khom vam kuv mus nrog nej ntaiv hlub ntaiv hli los kuv kuj tsis paub dab tsi li thiab. Kuv los kuj tseem yuav khom vam nej cov ua niam ua txiv, ua kwv ua tij ho mus nrog saib nrog xyuas thiab. Tus rauj qws txawm yuav raug rau saum wb ob tug mej koob los tus roj ntsha ces yuav raug rau saum nej cov ua niam ua txiv, ua kwv ua tij xwb lauj mog. Sawv tsis txhob pe mog."

Sawv daws pe txiv lwm mej koob tag. Tus noj xwm mam li tsaws ob khob cawv rau tub phib laj.

Cob Hauj Lwm Rau Phib Laj

Tus noj xwm tsaws ob khob cawv nyob hauv ib lub phaj cev rau phib laj. Nws thiaj li tsa ncauj hais rau phib laj hais tias:

    "N . . . e! (Hais phib laj lub npe) Txais ob khob cawv no saib yuam."

Phib laj thiaj li ncav tes mus txais nws ob khob cawv los tuav ntawm tes. Nws teb tus noj xwm li no:

    "Tau lawm los mas. Kuv txais cawv ntawm koj tes nawj mog. Koj muaj tus lus dab tsi ces cia li hais xwb los mas tsis tas yuav siv dej siv cawv ua kev ua cai os mog."

Thaum tus tub phib laj txais ob khob cawv los tuav ntawm tes los sis txawb tso rau saum rooj lawm. Tus noj xwm thiaj li ua nriav lus hais rau phib laj li no:

    "N . . . e! (Hais phib laj lub npe) Khwv koj lauj mog. Tav nov tus hluas yuav txob plaub txob ntug. Peb cov ua niam ua txiv yuav khom vam koj nrog tus hluas mus laj niam laj txiv tom ub. Khom vam koj nrog tus hluas mus ntaiv hnub ntaiv hli, mus pe niam pe txiv thiab pe neej pe tsav. Cuag li peb cov ua niam ua txiv yuav vam koj lub dag lub zog qhuav xwb. Peb twb npaj tsis muaj zoo kab phaj rawg ntxuag rau koj khaws, tsis muaj zoo ib pas dej pas cawv rau koj haus. Koj ua lub siab ntuj ntev mus nrog tus hluas laj naim laj txiv thiab lauj mog. Tus rauj qws ces yuav raug rau saum koj laud! Tus roj ntshav ces cia raug rau saum peb cov ua niam ua txiv. Niam txiv tom ub txawm hais lo siab lo qis los cia raug rau peb cov ua niam ua txiv xwb lauj mog."

Tus noj xwm hais li no tas ces nws coj cov hluas pe phib laj ob pes. Tus noj xwm thiab cov hluas thiaj li pe hais ntxiv li no:

    "Muaj lus ua koj tsaug mog, N . . . e! (Hais phib laj lub npe) Koj ua tiag ua lub siab ntuj ntev nrog tus hluas mus laj niam laj txiv tom ub, mus pe niam pe txiv, pe neej pe tsav lauj mog."

Phib laj mam li sawv txaum yim tsa lawv sawv daws li no:

    "Sawv lauj mog, tsis txhob pe lauj mog! Nej cov ua niam ua txiv khom vam kuv mus nrog tus hluas ntaiv hlub ntaiv hli los kuv kuj tsis paub dab tsi li. Qhov twg los yuav vam nej cov ua niam ua txiv nrog qhuab nrog qhia kuv xwb lauj mog. Tus rauj qws txawm yuav raug rau saum peb cov tub tshoob tub kos. Tab sis tus roj ntsha ces yuav raug rau saum nej cov ua niam ua txiv xwb lauj mog. Nej sawv daws sawv tsis txhob pe mog."

Sawv daws pe phib laj tag. Tus noj xwm mam li ho tsaws ob khob cawv uas nyob hauv ib lub phaj cev rau niam txais ntsuab.

Cob Hauj Lwm Rau Niam Txais Ntsuab

Tus noj xwm tsaws ob khob cawv rau niam txais ntsuab los sis tus zaum sawv cev niam txais ntsuab qhov chaw. Tus noj xwm ua nriav lus hais rau nws li no:

    "N . . . e! (Hais niam txais ntsuab lub npe los sis tus zaum rooj lub npe) Txais ob khob cawv no saib yuam."

Niam txais ntsuab los sis tus zaum niam txais ntsuab qhov chaw thiaj li txais ob khob cawv los tuav ntawm tes. Nws thiaj teb tus noj xwm hais tias:

    "Tau lawm los mas. Kuv txais cawv ntawm koj tes laid yuam. Koj muaj tus lus dab tsi ces cia li hais xwb los mas."

Thaum tus niam txais ntsuab txais ob khob cawv los tuav ntawm tes los sis txawb rau ntawm nws lub xub ntiag lawm. Tus noj xwm thiaj li ua nriav lus hais rau niam txais ntsuab li nram qab no:

    "N . . . e! (Hais tus zaum niam txais ntsuab qhov chaw lub npe) Khwv koj lauj mog. Tav nov tus hluas yuav txob plaub txob ntug. Peb cov ua niam ua txiv yuav khom vam koj tus ntxhais N . . . (hais niam txais ntsuab lub npe) mus nrog laj niam laj txiv tom ub. Khom vam nws mus nrog ua nkauj nyab luag. Cuag li peb cov ua niam ua txiv yuav vam tej tub tej ntxhais lub dag lub zog qhuav qhuav xwb. Peb twb tsis muaj zoo kab phaj rawg ntxuag rau koj khaws, twb npaj tsis muaj zoo pib dej pib cawv rau koj haus mog. Koj ua lub siab ntuj ntev cia N . . . (hais niam txais ntsuab lub npe) mus nrog laj naim laj txiv thiab lauj mog. Tus rauj qws ces yuav raug rau saum lawv laud! Tus roj ntshav ces cia raug rau saum peb cov ua niam ua txiv. Niam txiv tom ub txawm hais lo sib lo hnyav los cia raug rau peb cov ua niam ua txiv xwb lauj mog."

Tus noj xwm hais li no tas ces nws coj cov hluas pe niam txais ntsuab los sis tus zaum sawv cev nws qhov chaw ob pes. Tus noj xwm thiab cov hluas pe hais ntxiv li no:

    "Muaj lus ua koj tsaug mog, N . . . e! (Hais niam txais ntsuab lub npe) Koj ua tiag ua lub siab ntuj ntev mus nrog laj niam laj txiv tom ub, mus ua tus nyab luag thiab lauj mog."

Tus zaum niam txais ntsuab qhov chaw sawv tsees txaum yim tsa lawv sawv daws li no:

    "Sawv lauj mog, tsis txhob pe lauj mog! Nej cov ua niam ua txiv khom vam tus tub tus ntxhais nrog mus ntaiv hlub ntaiv hli, mus ua yaig ua luag los tej tub tej ntxhais kuj tsis paub tab dab tsi li. Qhov twg los yuav vam nej cov ua niam ua txiv nrog qhuab nrog qhia tej tub tej ntxhais xwb lauj mog. Yuav khom vam nej sawv daws ho mus nrog saib nrog xyuas nyob tsam niam txiv tom ub ho luab dej luab cawv ces tus ntxhais ho haus tsis tau xwb lauj mog. Tus rauj qws ces yuav raug rau saum lawv cov tub tshoob tub kos. Tab sis tus roj ntsha ces yuav raug rau saum nej cov ua niam ua txiv xwb lauj mog. Nej sawv daws sawv tsis txhob pe mog."

Sawv daws pe niam txais ntsuab tag. Tus noj xwm tig mus ua niam thiab txiv tsaug kom niam thiab txiv nrog nta tus hluas rooj tshoob rooj kos kom ntseg.

Lus Ua Niam Thiab Txiv Tsaug Kom Pab Nta Tshoob Kos

Tus noj xwm thiaj li tig mus ua nriav lus hais rau niam thiab txiv hauv tsev li no:

    "Ua txiv tsaug nawj mog! Tav nov tus hluas yuav txob plaub txob ntug. Ces neb ob tug ua niam ua txiv yuav tau txob txhawj lauj mog. Neb ua lub siab ntuj ntev nrog nta tshoob nta kos lauj mog."

Cov hluas thiaj li ib tsaug pe txiv li no:

    "Ua tsaug lauj mog txiv! Tus hluas txob plaub txob ntug ces neb ob tug ua niam ua txiv yuav tau kev txob txhawj xwb lauj mog."

Txiv thiaj li teb hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua dawb ua zoo, tsis txhob muaj hmab dawm tes, hlua dawm taw li lauj mog."

Tus noj xwm tig mus ua niam tsaug li no:

    "Ua niam tsaug nawj mog! Tav nov tus hluas yuav txob plaub txog ntug. Ces neb ob tug ua niam ua txiv yuav tau txob txhawj lauj mog. Neb ua lub siab ntuj ntev nrog nta tshoob nta kos lauj mog."

Cov hluas thiaj li ib tsaug pe niam li no:

    "Ua tsaug lauj mog niam! Tus hluas txob plaub txob ntug ces neb ob tug ua niam ua txiv yuav tau txob txhawj xwb lauj mog."

Tus txiv tsev nrog leej niam teb hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua dawb ua zoo, tsis txhob muaj hmab dawm tes, hlua dawm taw li lauj mog. Hnub no yuav tau tub tau nyab los rau hauv lub vaj lub tsev mas yuav tsum los nrog niam nrog txiv leg qav leg num kom ntseg nawj mog."

Tus noj xwm mam li tig mus hais rau ib tsoom niam hlob txiv hlob, niam ntxawm txiv ntxawm.

Lus Ua Txiv Hlob Niam Hlob, Txiv Ntxawm Niam Ntxawm Tsaug

Tus noj xwm thiaj li coj cov hluas pe tag nrho ib tsoom niam hlob txiv hlob thiab niam ntxawm txiv ntxawm. Nws ua nriav lus hais rau ib tsoom niam hlob txiv hlob tias:

    "Ua niam hlob txiv hlob N . . . (hais niam hlob thiab txiv hlob lub npe) tsaug nawj mog! Tav nov tus hluas yuav txob plaub txog ntug. Ces nej cov ua niam ua txiv yuav tau txob txhawj xwb lauj mog. Nej cov ua niam ua txiv yuav tau ua lub siab ntuj ntev nrog nta tshoob nta kos lauj mog." Hais ib tug zuj zus kom txhua tag nrho ib tsoom niam hlob txiv hlob sawv daws.

Cov hluas thiaj li ib tsaug pe txiv li no:

    "Niam hlob thiab txiv hlob N . . . (hais niam hlob txiv hlob lub npe) lauj! Tej hluas txob plaub txob ntug ces nej cov ua niam ua txiv yuav tau kev txob txhawj xwb lauj mog."

Ib tsoom niam hlob thiab txiv hlob thiaj li teb zom zaws hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua kaj ua zoo. Mus ua tshoob ua kos mas tsis pub kom muaj hmab dawm tes, hlua dawm taw li lauj mog. Mus ua tshoob ua kos mas tsis tseev kom ncauj lig qhauv nplaig los tav nej tej hau kab li nawj."

Thaum cov hluas pe niam hlob thiab txiv hlob tag lawm, tus noj xwm mam li tig ua nriav lus hais rau ib tsoom niam ntxawm txiv ntxawm li no:

    "Ua niam ntxawm txiv ntxawm N . . . (hais niam ntxawm txiv ntxawm lub npe) tsaug nawj mog! Tav nov tus hluas yuav txob plaub txog ntug. Ces nej cov ua niam ua txiv yuav tau txob txhawj xwb lauj mog. Nej cov ua niam ua txiv yuav tau ua lub siab ntuj ntev nrog nta tshoob nta kos lauj mog."

Cov hluas thiaj li ib tsaug pe txiv li no:

    "Niam thiab txiv N . . .  (hais niam ntxawm thiab txiv ntxawm lub npe) lauj! Tej hluas txob plaub txob ntug ces nej cov ua niam ua txiv yuav tau kev txob txhawj xwb lauj mog."

Niam ntxawm thiab txiv ntxawm thiaj li teb hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua kaj ua zoo. Hnub no mus ua tshoob ua kos tsis pub kom muaj hmab dawm tes, hlua dawm taw li lauj mog."

Tus noj xwm coj cov hluas pe ib tsoom niam hlob txiv hlob thiab ib tsoom niam ntxawm txiv ntxawm meej. Nws mam li coj cov hluas mus pe ib tsoom niam tij thiab tij laug uas tau pab tus hluas nta tshoob nta kos.

Lus Ua Tsaug Thov Niam Tij Thiab Tij Laug Pab Nta Tshoob Kos

Tus noj xwm coj cov hluas pe ib tsoom niam tij thiab tij laug. Nws ua nriav lus hais rau cov niam tij thiab tij laug ib tug zuj zus li nram no:

    "Ua niam tij thiab tij laug N . . . (hais niam tij thiab tij laug lub npe) tsaug nawj mog! Tav nov tus hluas yuav txob plaub txob ntug. Ces nej cov ua tij yuav tau txob txhawj xwb lauj mog. Luag hais tias tij vi tam niam txiv. Niam txiv tam rooj ntug. Nej cov ua tij yuav tau ua lub siab ntuj ntev nrog nta tshoob nta kos kom ntseg log puav tam ncej txawb lauj mog."

Cov hluas thiaj li ua ib tsaug pe niam tij thiab tij laug li no:

    "Niam tij thiab tij laug N . . . (hais niam tij thiab tij laug lub npe) lauj! Tej hluas txob plaub txob ntug ces nej cov ua tij yuav tau kev txob txhawj xwb lauj mog."

Niam tij thiab tij laug li teb hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua kaj ua zoo. Hnub no mus ua tshoob ua kos tsis pub kom muaj hmab dawm tes, hlua dawm taw li lauj mog. Mus ua tshoob ua kos mas kom tau tshoob tau kos, tau poj tau sev rov los pab niam thiab txiv leg qav leg num xwb lauj mog."

Tus noj xwm coj cov hluas pe ib tsoom niam tij thiab tij laug tag. Tus noj xwm mam li tig mus hais rau ib tsoom kwv tij neej tsa (muam thiab yawm yij, niam dab laug txiv dab laug, phauj thiab yij laug, ib tsoom phooj ywg, thiab ib tsoom txheeb ze uas nyob sib ze ua ke.)

Lus Ua Ib Tsoom Kwv Tij Neej Tsa Tsaug

Tus noj xwmho ua nriav lus hais rau ib tsoom kwv tij neej tsa raws li nram no:

    "Ua N . . . (hais lub npe xws li: pog thiab yawg, muam thiab yawm yij, niam dab laug txiv dab laug, phauj thiab yij laug, thiab phooj ywg) tsaug nawj mog! Tav nov tus hluas yuav txob plaub txob ntug. Ces nej cov ua niam ua txiv yuav tau txob txhawj xwb lauj mog. Nej cov ua niam ua txiv yuav tau ua lub siab ntuj ntev nrog nta tshoob nta kos lauj mog."

Cov hluas thiaj li ib tsaug pe txiv li no:

    "N . . . (hais lub npe raws li: pog thiab yawg, muam thiab yawm yij, niam dab laug txiv dab laug, phauj thiab yij laug, thiab phooj ywg) lauj! Tej hluas txob plaub txob ntug ces nej cov ua niam ua txiv yuav tau kev txob txhawj xwb lauj mog."

Tus uas cov hluas tab tom pe ntawd thiaj li sawv los teb hais tias:

    "Sawv tsis txhob pe lauj mog. Hnub no mus ua tshoob ua kos mas tseev kom mus tau tub tau nyab rov qab los rau hauv vaj hauv tsev ov mog. Mus ua tshoob ua kos mas kom mus ua dawb ua huv, mus ua kaj ua zoo. Hnub no mus ua tshoob ua kos mas tsis tseev kom muaj hmab dawm tes, hlua dawm taw li lauj mog. Mus ua tshoob ua kos mas kom tau tshoob tau kos, tau poj tau sev rov los rau hauv vaj hauv tsev lauj mog."

Tub Tshoob Tub Kos Lus Ua Tsaug Cawv

Thaum tus noj xwm coj cov hluas ua cov tub tshoob tub kos, niam thiab txiv, niam hlob txiv hlob, niam ntxawm txiv ntxawm, niam tij thiab tij laug, thiab tsoom kwv tij neej tsa sawv daws tsaug meej lawm. Cov tub tshoob tub kos (cov uas tau txais ob khob cawv los ntawm tus noj xwm) thiaj li sawv txaum yim ua tsaug cawv li no:

    "N . . . e! (Hais tus noj xwm lub npe los sis niam thiab txiv lub npe.) Ua tsaug cawv lauj mog. Niam thiab txiv tsis cia li, niam thiab txiv tseem muaj dej muaj cawv rau peb haus, muaj kab phaj rawg ntxuag rau peb khaws. Niam thiab txiv tseem muab peb saib rau lub sam xeeb thiab. Muaj lus ua tsaug lauj mog! Ib tsam nej muaj chaw siv nej tsis pom qab muab qhov twg los siv laiv mog."

Tus noj xwm, niam thiab txiv, thiab cov kwv tij thiaj li txais yim teb hais tias:

    "Tsis txhob ua tsaug lauj mog. Peb cov ua niam ua txiv vam vam koj lub dag lub zog mus nrog ntaiv hnub ntaiv hli, mus laj niam laj txiv. Peb twb npaj muaj tsis zoo ib khob cawv rau koj haus, muaj tsis zoo ib phaj ntxuag rau koj khaws mog. Cuag li peb yuav khom vam koj lub dag lub zog qhuav qhuav xwb mog. Qhov no tsuas yog ib pas nyuag cawv qaub yaug ncauj xwb. Tsis txhob ua tsaug lauj mog."

Cov tub tshoob tub kos leej twg ua tus noj xwm thiab niam thiab txiv tsaug los yeej hais zoo tib yam. Tus noj xwm thiab niam thiab txiv puav leej teb zoo tib yam nkaus thiab xwb.

Txuas ntxiv rau Txheej txheem cob kaus rau mej koob.

Txheej Txheem Cob Kaus Rau Ob Tug Mej Koob

Thaum tus noj xwm coj cov hluas pe cov tub tshoob tub kos tag, tus cawv nkaw lus twb mus txog tom ob tug tub tsawb cawv ntev lawm. Ob tug tub tsawb cawv thiaj li sawv thiab hais rau ob tug tub chiv cawv tias:

    "Neb tus cawv nkaw lus los txog ntawm wb no lawm es cob los tsawb os?"

Ob tug tuaj tom hauv paus rooj thiaj sawv teb tias:

    "Cawv los txog ntawm ko lawm no ces cob ntawm ko es rov khob qhuav rov qab los rau wb. Wb yuav chiv tus me cawv tsa mej koob sawv kev mus ua tshoob ua kos tuaj rau peb sawv daws haus os."

Ob tug tuaj tom tw rooj thiaj li haus nkawd ob khob cawv thiab rov plaub lub khob qhuav mus rau ob tug tuaj tom hauv paus rooj. Ob tug tub chiv cawv thiaj li chiv tus cawv tsa mej koob sawv kev tuaj rau ib tsoom kwv tij neej tsa haus:

    "Hais rau neb ob tug tom tw rooj ko thiab ib tsoom niam txiv kwv tij neej tsa sawv daws. Wb yuav chiv niam txiv tus cawv tsa mej koob sawv kev mus ua tshoob ua kos tuaj rau sawv daws haus. Thov rau ib tsoom niam txiv kwv tij neej tsa sawv daws pab haus kom cob meej xeeb kum no nawj. Sawv daws haus tus cawv no kom cob meej xeeb kum kom ob tug mej koob coj tub thiab nyab mus lov cwj kom mus kaj mus huv. Kom ob tug mej koob mus ua tshoob ua kos mas kom tau tub thiab nyab rov qab los txog rau niam txiv lub vaj lub tsev no nawj."

Lub sib hawm sawv daws tab tom chiv tus cawv tsa mej koob sawv kev, tus noj xwm tuav lub kaus ntawm nws txhais tes. Lub kaus no mas yuav tsum muab ib txoj siv ceeb los khi rau ntawm duav. Tsis tag li ntawd xwb yuav tsum khi ua hlua rhaus thiab kom khov tsis txhob plam. Tus noj xwm ce plaub khob cawv. Nws cev ib leeg ob khob rau ob tug me koob. Tus noj xwm txaum yim rau ob tug mej koob tias :

    "Kuv sawv tshaj neb ob tug txiv tuam mej koob lwm mej koob laid yuam!"

Tus noj xwm seev suab hais zaj cob kaus rau ob tug mej koob. Saib zaj cob kaus.

Tus noj xwm hais zaj cob kaus meej ces nws thiaj li cev lub kaus rau ob tug mej koob hais tias:

    "Tuam mej koob thiab lwm mej koob! Hnub no niam txiv khom vam neb mus nrog niam txiv ntaiv hnub ntaiv hli ces niam txiv muab lub kaus vej kaus vuam no rau neb ob tug coj mus ua puav pheej tshoob. Niam txiv xav kom hnub no neb coj niam txiv qhov puav pheej no mus ua tshoob ua kos mas kom tau tub tau nyab rov qab los txog vaj txog tsev no mog."

Tus txiv tuam mej koob los sis txiv lwm mej koob txais lub kaus los tuav ntawm tes. Ob tug mej koob tib tsaug teb hais tias:

    "Nej cia cia siab rau wb los wb kuj tsis paub dab tsi li thiab. Nej cov ua niam ua txiv yuav tau lawv wb qab tuaj nrog wb sab laj thiab. Muaj dab tsi los wb yeej cia siab rau nej cov ua niam ua txiv nrog pab wb thiab xwb lauj."

Tus noj xwm thiaj li teb zoo li no:

    "Neb ob tug los ua lub siab loj thiab. Mam li kom N . . . (hais lub npe) nrog nej mus thiab. Ib chim peb cov ua niam ua txiv yeej yuav lawv nej qab tuaj. Muaj dab tsi los peb mam li sib cog sab laj."

Ob tug mej koob thiaj li teb yam zoo siab hais tias:

    "Wb mas yeej tsis paub li nawj. Yuav vam nej cov ua niam ua txiv nrog qhuab nrog qhia xwb ov."

Thaum ob tug mej koob txais tau lub kaus los tuav ntawm tes lawm, txiv tuam mej koob los sis lwm mej koob thiaj li sawv txaum yim rau tus noj xwm li no:

    "Sawv tshaj koj laid yuam."

Nws kuj hais rau cov ua niam ua txiv li no thiab:

    "Sawv tshaj nej cov ua niam ua txiv sawv daws nawj."

Mej koob mam li seev suav hais zaj txais lub kaus.

Tas no ces tus noj xwm mam li pib txuas ntxiv rau Txheej txheem cob nyiaj txiag rau ob tug mej koob.

Txhiaj Txheej Nyob Hauv Lub Kawm

Cov khoom nyob hauv lub kawm muaj raws li nram qab no:

2 tug qaib hau siav coj mus noj sus tom kev.

1 pob mov coj mus noj sus tom kev.

1 thawv dej qab zib los sis dej cawv mus haus noj sus tom kev.

4 rab diav coj mus noj sus tom kev.

1 pob ntaub so tes coj mus so tes thaum noj sus tom kev.

10 lub phaj ntawv coj mus siv noj sus tom kev.

1 tug qaib siav coj mus ua qaib npws poj tom niam txiv tog ntxhais tsev.

1 pob mov coj mus npws poj tom niam txiv tog ntxhais tsev.

1 thawv dej coj mus npws poj tom niam txiv tog ntxhais tsev.

1 kav luam yeeb coj mus tsab rau kev neej kev tsav.

1 lam fwj roj.

1 poom ntsev.

1 hnab me nyuam txhuv.

4 lub khob cawv coj mus haus cawv.

3 thawv dej cawv coj mus siv tom niam txiv tog ntxhais tsev.

2 thawv dej qab zib coj mus siv tom niam txiv tog ntxhais tsev.

1 lub kawm ris cov txhiaj txheej.

Dua li cov khoom hauv lub kawm lawm, kuj tseem yuav tau npaj xws li:

1 rab riam los sis rab liag coj mus ua riam dab.

2 tug qaib ciaj coj mus ua qaib dab (Yog neej tsa tom ub yuav qaib dab) los sis,

1 tug npua ciaj coj mus ua npua dab (yog neej tsa yuav npua dab.)

1 daig pam rau tus vauv ev.

Txheej Txheem Cob Nyiaj Rau Mej Koob

Mej koob hais zaj txais kaus meej ces ob tug mej koob thiaj li cev nkawd ib leeg ib khob cawv rau tus noj xwm nrog nkawd haus:

    "N . . . (hais tus noj xwm lub npe.) Txais khob cawv no seb!"

Tus noj xwm thiaj li txais ob khob cawv ntawm ob tug mej koob tes los tuav:

    "Tau lawm los mas. Kuv txais neb tes laid yuam."

Tus noj xwm txhob kom lawv haus lawv cov cawv:

    "Haus! Peb haus kom meej tso kuv ho yuav pib lawm tom ntej seb."

Lawv haus lawv cov cawv meej ces tus noj xwm mam li teev dua plaub khob cawv. Nws tsaws ob tug mej koob ib leeg ob khob. Ob tug mej koob thiaj li txais plaub khob cawv mus tso tseg rau saum rooj. Tus noj xwm thiaj li muab cov nyiaj los feeb rau ob tug mej koob nqa mus. Niaj hnub no mas niam txiv kwv tij neej tsa Hmoob sau nqi tshoob nqi kos zoo raws li nram no:

 •   $200.00 muas niam txiv hauv tsev ib puas txoj cai kev txhaum.

 •   $5,000.00 - $6,000.00 nqi mis nqi hno.

 •   $600.00 nqi noj haus.

 •   $100.00 ib lub ncos rau nus tij cob txheeb.

 •   $100.00 ib lub ncos rau txiv cob txheeb.

 •   $50.00 ib lub ncos rau nus npaws.

 •   $200.00 ib lub khaub tshos txooj rau txiv. ($100.00 khaub tshos tab.)

 •   $200.00 ib lub khaub tshos txooj rau niam. ($100.00 khaub tshos tab.)

 •   $100.00 poj tsiag zov kwv. (Ob tug pog ces $200.00)

 •   $50.00 ntaus nqi ib tug npua dab.

 •   $10.00 ntaus nqi ob tug qaib dab.

 •   $10.00 ntaus nqi ib rab riam dab.

 •   $200.00 nyiaj sia siv.

 •   $20.00 nyiaj cheb rooj.

 •   $20.00 nyiaj ris khee tw.

 •   $100.00 ntaus nqi dej cawv niam txiv kom nraug vauv pab.

Cov nyiaj uas teev los saum toj no mas tej lub zos kuj tseem sau ntau zog los sis tsawg zog. Hauv qab no yog ib tug piv txwv tus noj xwm cob $10,000.00 rau ob tug mej koob coj mus siv rau niam thiab txiv rooj tshoob.

Tus noj xwm rov qab tsaws cawv rau ob tug mej koob ces nws mam li ua nriav lus hais rau nkawd li nram qab no:

    "Hais rau neb ob tug mej koob! Tav nov naim txiv khom vam neb mus nrog niam txiv laj tshoob laj kos. Niam txiv los kuj ua lub neej tsis xws luag neej. Niam txiv ua lub neej tuaj qab tsag. Niam txiv nyiaj txiag tsuas muaj $10,000.00 no xwb. Mas muab $10,000.00 no rua neb ob tug mej koob nqa mus siv. Yog ho tshuav qhov twg tsis txaus los niam txiv thiab cov kwv tij mam li ho nrhiav ntxiv. Hos yog ho txaus lawm los haj yam zoo. NIam thiab txiv muab los tso rau ntawm no es kuv muab cob rau neb ob tug."  Tus noj xwm cev cov nyiaj rau ob tug mej koob.

Ob tug mej koob txais cov nyiaj los suav. Nkawd thiaj li muab suav $1,000.00 ua ib pawg. Nkawd suav tag kaum pawg, cov nyiaj muaj txwm kaum txhiab. Ib tug mej koob thiaj li hais rau tus noj xwm li no:

    "Cov nyiaj no nej cov ua niam ua txiv yuav kom wb nqa los yeej zoo kawg. Wb tsuas nqa li $500.00 tau chaw siv ua ntej xwb. Dua li cov ces nej cov ua niam ua txiv mam li nqa lawv qab. Txog thaum lub caij wb yuav siv no ces wb mam li hais kom nej muab los."

Ob tug mej koob thiab tus noj xwm sib thib qhov nqa nyiaj. Txog thaum kawg ces niam thiab txiv mam li ua tus nqa lawv qab. Tus noj xwm muab $500.00 rau ob tug mej koob nqa ua ntej. Tus noj xwm hais ntxiv li no:

    "Hais rau neb ob tug mej koob. Thaum neb mus txog tom niam txiv tsev. Lub sib hawm neb rub tau lub rooj los ntos tshoob ntos kos no ces neb xub tso ob me pua ua ntej rau saum rooj muas niam txiv kev txhaum tso muaj dab tsi los neb mam li ua ntxiv mus. Neb yuav tsum xub muas niam txiv ib puas txoj cai ua ntej tso xwv tshoob kos thiaj li tsis nyuab rau neb ob tug."

Ob tug mej koob thiaj li teb hais tias:

    "Nej cov ua niam ua txiv pom zoo ces wb mam li ua raws li nej hais. Peb nyob rau lub teb chaws no tshoob kos txog leej twg los puav leej tso. Hnub no peb mus ua tshoob ua kos xeeb txog niam txiv tom ub ces peb yuav tsum tau tso thiab xwv tshoob kos thiaj li tsis nyuaj rau peb."

Cov kwv tij teb zom zaws tias:

    "Hnub no peb mus yuav txog lawv ces peb yuav tsum tau tso. Lwm hnub lawv ho tuaj xeeb txog peb los peb mam li ho sau. Lwm hnub yog lawv yuav kuv ntxhais ses kuv yuav sau laid. Yog leej twg tsis tso mas tshoob kos yeej hais tsis tiav li hos."

Tus noj xwm cob nyiaj txiag meej rau mej koob ces nws ho tsaws lub kawm los ib rau ntawm rooj thiab cob rau ob tug mej koob. Nws rov tsaws ob tug mej koob ib leeg ob khob cawv thiab hais rau nkawd tias:

    "Ntawm no yog niam txiv hauv tsev no cov nyuag txhiaj txheej rau neb coj mus ntos tshoob ntos kos. Neb hais rau niam txiv tom ub tias, tej laus thaum ub mas yog peb tas peb tas txhuv ntsiab. Tab sis niam txiv tom no ua lub neej tuaj qab tsag thiab. Niam txiv tsuas muaj ib nyuag qho txhuv, ib poom ntsev, ib lam fwj roj, ib kav luam yeeb, thiab ib tug nyuag ntxias liaj nrog ib pob mov rau niam txiv tom ub npws poj npws yawm. Qhov no ces yog ob tug nyuag ntxias rau nej coj mus noj sus tom kev. Ob tug nyuag ntawm no ces npaj rau nej coj mus ua qaib qhia tsiaj. Kuv muab cob rau neb. Neb ho nrog kuv txheeb seb tshuav yam twg no ces ho hais niam thiab txiv mam li nrhiav."

Ob tug mej koob thiaj li los muab lub kawm tshawb seb puas muaj txhij. Yog ho tshuav yam twg tsis txhij no ces nkawd mam li hais kom niam txiv npaj ntxiv. Yog muaj txhij lawm no ces mej koob thiaj li teb tus noj xwm tias:

    "Raws li kuv muab txheeb xyuas mas muaj txhij lawm."

Thaum ob tug mej koob txheeb cov txhiaj txheej nyob hauv lub kawm muaj txhij lawm ces lawv thiaj li haus lawv cov cawv kom meej. Ob tug mej koob thiaj li coj phib laj thiab tus hluas uas yuav poj niam los sawv nram qab rooj pe niam pe txiv.

Cheem Niam Thiab Txiv Nyob Hauv Tsev Tos

Tus noj xwm cob lub kaus meej rau ob tug mej koob tag. Sawv daws haus tus txheej txheem cawv meej tib si lawm. Tus txiv tuam mej koob thiaj li tuav lub kaus ntawm tes thiab sawv mus tuaj nram qab rooj qhia phib laj thiab tus hluas pe niam thiab pe txiv:

    "Phib laj thiab N. . .  (Hais tus hluas yuav poj niam lub npe.) Neb los sawv ua ib ntxaig rau ntawm no tiag xub ntiag rov pem hauv plag seb. Kuv coj neb pe niam pe txiv tso peb yuav sawv kev mus ntos tshoob ntos kos."

Phib laj thiab tus hluas los sawv ua ib txig rau nram qab rooj. Tus vauv sawv tuaj sab npuas tog txuas. Txiv tuam mej koob thiaj li los coj nkawd pe niam pe txiv li no:

    "Pe poj koob yawm koob! Hnub no peb yuav mus ua tshoob ua kos. Vam poj koob yawm koob nrog pov yoom pov yawm kom mus ua dawb ua zoo, kom mus tau tshoob tau kos tsheej neeg tsheej tsa ntag no nawj."

    "Pe niam pe txiv! Hnub no tus tub N . . . (Hais tus hluas lub npe) yuav mus txob plaub txob ntug rau niam rau txiv nres. Thov rau niam rau txiv ho ua lub siab ntev nyob hauv vaj hauv tsev tos mog."

    "Pe ib tsoom niam hlob txiv hlob! Hnub no tus tub N . . . (Hais tus hluas lub npe) yuav mus txob plaub txob ntug rau niam rau txiv nres. Thov rau nej cov ua niam ua txiv ho ua lub siab ntev nyob hauv vaj hauv tsev tos mog."

    "Pe ib tsoom niam ntxawm txiv ntxawm! Hnub no tus tub N . . . (Hais tus hluas lub npe) yuav mus txob plaub txob ntug rau niam rau txiv nres. Thov rau nej cov ua niam ua txiv ho ua lub siab ntev nyob hauv vaj hauv tsev tos mog."

    "Pe ib tsoom muam phauj yawg laus! Hnub no tus tub N . . . (Hais tus hluas lub npe) yuav mus txob plaub txob ntug rau niam rau txiv nres. Thov rau nej cov ua niam ua txiv ho ua lub siab ntev nyob hauv vaj hauv tsev tos mog."

    "Pe ib tsoom niam dab laug txiv dab laug! Hnub no tus tub N . . . (Hais tus hluas lub npe) yuav mus txob plaub txob ntug rau niam rau txiv nres. Thov rau nej cov ua niam ua txiv ho ua lub siab ntev nyob hauv vaj hauv tsev tos mog."

    "Pe ib tsoom niam tij thiab tij laug! Hnub no tus kwv N . . . (Hais tus hluas lub npe) yuav mus txob plaub txob ntug rau nej cov ua tij nres. Thov rau nej ua tij ho ua lub siab ntev nyob hauv vaj hauv tsev tos mog."

Thaum tus mej koob hais ib nqe lus twg xaus nkaus mas ob tug hluas (phib laj thiab tus hluas uas yuav poj niam) yuav tsum tib tsaug pe ob pes. Lub sib hawm thaum ob tug mej koob tab tom coj ob tug hluas pe niam pe txiv ntawd, cov uas yog niam thiab txiv kuj yuav tsum txais yim teb ib co lus tsa ob tug hluas zoo li no:

    "Sawv lauj mog! Hnub no mus ua tshoob ua kos mas kom tau tsheej tshoob tsheej kos nawj. Hnub no mus kev nqaim mas kom rov kev dav. Kom mus ua kaj ua huv tsis muaj xaiv muaj lus, tsis muaj plaub muaj ntug no mog."

Ob tug mej koob coj ob tug hluas pe niam thiab pe txiv tag ces nkawd tig mus hais rau cov ua niam ua txiv sawv daws tias:

    "Nej sawv daws nyob os mog. Hnub no peb mus ua tshoob ua kos es nej ho mloog xov tom qab thiab mog. Nej sawv daws ho ua lub siab ntev nyob hauv vaj hauv tsev tos wb ob tug mej koob tau lub chaw rov qab los sab laj ib zag zoo tswv yim mog."

Niam thiab txiv, niam hlob txiv hlob, niam ntxawm txiv ntxawm, niam tij thiab tij laug, thiab ib tsoom kwv tij neej tsa thiaj li teb ob tug mej koob zom zaws hais tias:

    "Nej sawv daws ua lub siab loj mog. Ib me chim peb cov ua niam ua txiv ob-peb tug mam li lawv nej qab tuaj nrog nej sab laj. Nej mus yog muaj chaw daig nqe twg no los ho hu rov qab los rau peb cov ua niam ua txiv thiab mog."

Muaj ib txhia teb zoo li no:

    "Nej sawv daws ua lub siab loj thiab. Niam txiv tom ub los kuj yog phauj thiab yawg laus nkawd xwb. Nyaj phauj thiab yawg laus nkawd yuav tsis ua nkhaus rau peb cov ua txiv dab laug thiab."

Ob tug hluas pe cov ua niam ua txiv tag ces nkawd thiaj li mus ev nkawd ob lub nra. Tus hluas ev daim pam hos tus phib laj mus ris lub kawm. Ob tug mej koob nqa lub kaus thiab rhais ruam tawm ua ntej rau nraum zoov. Tus phib laj lawv liag tus txiv lwm mej koob qab. Tus tub tawm ua tus nyab ntej. Niam txais ntsuab yog tus tawm tom qab kawg nkaus npuas tus nyab. Tag nrho lawv 6 leej sam sim tuaj mus rau tom niam tais yawm txiv tsev. Ob tug mej koob xav ntsoov hauv nruab siab tias lawv yuav mus so noj su rau thaj chaw twg.

Noj Sus Tom Kev - Thaum Mus

Raws li Hmoob cov laus ib txhis ua tshoob ua kos los mus, ob tug mej koob tom ub yuav tsum coj qhua tshoob qhua kos mus so noj sus tom ib tog kev. Lawv txawm mus noj sus ntawm niam txiv tom ub tog vaj tog tsev xwb los yeej tsis txhaum niam txiv txoj kev cai dab tsi. Txawm hais tias niam txiv tom ub thiab niam txiv tom no nyob kem kwj tse xwb los ob tug mej koob yuav tsum tau noj sus. Yog ob tug tshaj mej tsis noj sus mas nkawd yuav raug ob tug txum mej nplua dej nplua cawv. Ob tug tshaj mej noj sus, tab sis nkawd tsis tshwj plaub txhais ko taw qaib cia rau hauv qab kawm ces nkawd yeej yuav raug nplua cawv thiab. Yog ib qho tseem ceeb heev uas thaum tab tom noj sus ntawd ob tug mej koob yuav tsum muab plaub txhais ko taw qaib qhwv kiag cia rau hauv qab kawm. Yuav tau ceev faj tsam tus vauv thiab tus phib laj muab ko taw qaib cua meej lawm.

Lawv mus txog ntawm qhov chaw so noj sus. Ob tug mej koob thiaj li kom tus phib laj thau ob tug qaib ntim su hauv lub kawm thiab pob mov nrog ib lam fwj dej tawm los. Tus mej koob hais rau phib laj hais tias:

    "Phib laj! Koj hauj lwm tuaj lawm lau. Koj mus thaum pob mov thiab ob tug qaib ntim su los dua rau peb noj sus yuam. Koj muab ob tug qaib dua plaub tug ncej puab qaib rau ob lub phaj thiab muab cev rau niam txais ntsuab. Dua li cov ces koj muab dua tsuag tsuag tso rau hauv ib co phaj los rau peb plaub tug noj. Koj thau ib lam fwj cawv los rau peb sawv daws tau haus ntxuag nqaij thiab."

Phib laj mus thau ob tug qaib los dua rau lawv noj. Nws dua pluab tug ncej puab qaib rau ob lub phaj. Phib laj muab cov uas seem ntawd dua tsuag tsuag rau ib co phaj. Nws muab ntsev los pleev rau cov nqaij qaib.

Ib tug mej koob muab ib lam fwj npias los tho. Nws hliv ib khob npias. Tus mej koob muab ib rab diav mus teev ib qho mov thiab ib daig nqaij qaib. Nws thiaj li tig rau tom ntug kev hais zaj laig dab - thaum mus. Thaum tus mej koob hais zaj laig dab xaus nkaus ces nws ua nriav lus hais ob peb los li no:

    "Vuav hnub no peb tuaj mus ua tshoob ua kos. Peb noj sus ces peb hu txog niam txiv poj yawm, hu txog xeeb teb xeeb chaw nrog peb noj sus ov. Nej yuav los noj pov hwm haus pov yawm, ntis xaiv ntis lus, ntis ncauj nplaig qhuav lig thiab ntis mob ntis ntsaj. Hnub no peb mus ua tshoob ua kos mas tseev kom peb mus kaj los huv, mus dawb los zoo no auv! Peb mus ua tshoob ua kos mas kom tau neej tau tsav, tau kev ntsuab kev ze nawj."

Phib laj nqa ob taig ncej puab qaib mus cev rau tus niam txais ntsuab. Ob tug mej koob thiaj li hais rau niam txais ntsuab hais tias:

    "Niam txais ntsuab! Nov yog koj hauj lwm nawj. Tsam koj tus nyab ho txaj txaj muag rau peb plaub tug ces koj coj nws nrog koj noj nawj. Plaub tug ncej puab qaib ko yog neb tug. Neb yeej meem noj kom huv huv nawj mog."

Mej koob kuj tig mus hais rau tus nyab tias:

    "Me nyab os! Qhov yuav tau noj ncej puab qaib ces tag zaum no lawm nawj. Koj tsis txhob txaj muag rau peb cov nyob ntawm no. Niam txais ntsuab neb yeej meem noj kom huv huv lwm hnub thiaj li tsis nco khuv xim koj ob tug ncej puab qaib nawj mog."

Niam txais ntsuab txais ob phaj qaib los rau nws thiab nws tub tis nyab noj. Ob tug mej koob, phib laj, thiab vauv mam li noj cov kooj tis, tob hau, thiab hauv siab. Lawv ke noj thiab ke tso daj tso luag kom lom zem. Tom qab lawv noj mov meej lawm ces tus phib laj thiaj li mus sau cov nqaij thiab cov mov seem ntim rov rau hauv lub kawm. Lawv sawv daws thiaj li rov sam sim mus tom niam tais yawm txiv tsev.

Mus Txog Ntawm Niam Txiv Tog Ntxhais Tsev

Raws li Hmoob kev cai ua tshoob ua kos mas ob tug mej koob yuav tsum nkag ntawm qhov rooj tag mus rau hauv niam txiv tog ntxhais tsev. Yog ob tug mej koob tsis paub kev cai, nkawd nkag ntawm qhov rooj txuas mus rau hauv niam txiv tsev no ces niam txiv muaj cai nplua kaum ob lag nyiaj. Tej zaum mas niam txiv tog ntxhais tseem npaj ob tug neeg sawv sab hauv tsev tos ob tug tshaj mej. Ob tug mej koob, tshaj mej, yuav tsum tau hais zaj qhib qhov rooj yog tias ob tug hauv tsev hais zaj kaw qhov rooj. Niam thiab txiv kuj npaj muaj cawv yeeb cawv tshuaj. Ob tug mej koob yuav tsum tau haus niam txiv tus cawv yeeb cawv tshuaj. Mej koob yuav tsum txawj hais zaj tsab yeeb tsab tshuaj thiab zaj ua tsaug cawv yeeb cawv tshuaj.

Ob tug mej koob coj phib laj, niam txais ntsuab, tus vauv thiab tus nyab mus txog ntawm niam txiv tsev. Lawv mus rau tom niam txiv lub qhov rooj tag. Tus tuam mej koob thiaj li khob niam txiv qhov rooj thiab hu tias:

    "Niam thiab txiv nej puas nyob hauv tsev os?"

Niam thiab txiv qhib qhov rooj thiab khoov tuaj xauj nraum zoov:

    "Peb nyob hauv tsev los mas. Nej sawv daws tuaj los. Nej sawv daws los tsev os."

Ob tug mej koob teb niam thiab txiv tias:

    "Yog! Peb tuaj los mas."

Niam txiv hauv tsev thiaj li caw lawv los tsev:

    "Nej sawv daws los tsev os. Los tsev ma yuam."

Mej koob teb tias:

    "Peb yeej yuav los hauv niam thiab txiv tsev ntag ov."

Cov qhua nyob nraum zoov thiaj li chaws los hauv tsev. Thaum lawv hla niam txiv tus taw rooj los txog hauv tsev mas cov nyob hauv tsev hu lawv thiab tuav tes tias:

    "Tuaj los qhua."  "Tuaj los qhua."

Cov tuaj sab nraud tuaj teb tias:

    "Aws! Peb tuaj os."

Tus phib laj thiab tus vauv yuav tsum hle khau rau nraum zoov los sis qhov chaw rau khau ua ntej nkawd chaws los hauv niam txiv tsev. Phib laj thiab vauv thiaj li txo nkawd ob lub nra. Muab lub kawm coj mus pheeb rau ntawm hauv plag los sis ib sab phab ntsa cia. Tus nyab hle tus vauv pob pam coj mus cia rau tom txaj.

Phib laj thiab vauv hle nkawd ob lub nra tag ces mej koob thiaj li kom nkawd los sawv rau ntawm tag. Nkawd tig xub ntiag rau pem hauv plag. Ob tug mej koob thiaj li coj phib laj thiab vauv los pom niam pom txiv li no:

    "Pom poj koob yawm koob! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov niam txiv ua lub siab ntev lauj mog."

    "Pom niam pom txiv! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov niam txiv ua lub siab ntev lauj mog."

    "Pom ib tsoom niam hlob txiv hlob! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov niam hlob txiv hlob ua lub siab ntev lauj mog."

    "Pom ib tsoom niam ntxawm txiv ntxawm! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov niam ntxawm txiv ntxawm ua lub siab ntev lauj mog."

    "Pom ib tsoom nus tij nus kwv! Peb coj nej nkauj nej muam lawm ob niaj peb hnub tseg tau lub vaj lub tsev ntxhov hnyo los thov nus tij nus kwv ua lub siab ntev lauj mog."

    "Pom ib tsoom niam dab laug txiv dab laug! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov niam dab laug txiv dab laug ua lub siab ntev lauj mog."

    "Pom ib tsoom muam phauj yawg laus! Peb coj niam txiv tub niam txiv ntxhais lawm ob niaj peb hnub tseg tau niam txiv vaj tse ntxhov hnyo los thov muam phauj yawg laus ua lub siab ntev lauj mog."

Thaum phib laj thiab vauv nkawd tab tom pe mas niam txiv teb tsa nkawd zoo li no:

    "Sawv lauj mog! Niam txiv tub ntxhais ces niag dab dab tuag. Niam txiv tub ntxhais raws nej mus xwb es xyov nej puas yuav yuav tiag os."

Los sis lawv teb zoo li no thiab:

    "Sawv lauj mog! Hnub no nraug vauv pom xeeb tuaj coj tau niam txiv tub niam txiv ntxhais mus lawm mas nraug vauv yeej meem hlub kom kawg qub kawg ntsis nawj."

Mej koob coj phib laj thiab vauv pom neej pom tsav tag ces lawv thiaj li mus zaum. Lawv mus zaum zoj ib pliag ces ob tug mej koob thiaj li mus thau luam yeeb los tsab rau ib tsoom kev neej kev tsav uas nyob hauv lub tsev. Mej koob tsab ob tug luam yeeb rau txiv, niam, nus tij, nus kwv, thiab txhua txhua tus. Nco ntsoov tias tsab ib leeg ob tug luam yeeb. Thaum mej koob tsab luam yeeb mas mej koob hais zoo li no:

    "Txais ib kab yeeb seb yuam."

Niam thiab txiv ua txoj yig li no:

    "Tau lawm los ma. Tau lawm kuv tsis hlawv. Koj kav tsij tsab rau lwm tus."

Tab sis tus mej koob yuam tas zog kom txais:

    "Kav tsij txais ma. Tseem kev tseem cai nej cov ua niam ua txiv yuav tsum txais hos. Kav tsij txais nkaus ma."

Mej koob txawm tsab rau leej twg los puav leej hais zoo tib yam. Ob tug mej koob tsab kom txhua cov kev neej kev tsav uas nyob hauv niam txiv lub tsev. Nkawd tsab txhua lawm ces tus txiv tuam mej koob thiaj li tsab ib teg luam yeeb rau tus txiv cob txheeb los sis ib tug laus neeg tseem ceeb nyob hauv niam txiv tsev. Mej koob tsab luam yeeb rau tus txiv cob txheeb li no:

    "Kab no rau poj koob yawm koob."

    "Kab no rau txiv."

    "Kab no rau niam loj."

    "Kab no rau niam yau."

    "Kab no rau ib tsoom niam hlob txiv hlob."

    "Kab no rau ib tsoom niam ntxawm txiv ntxawm."

    "Kab no rau ib tsoom nus tij nus kwv."

    "Kab no rau ib tsoom niam dab laug txiv dag laug."

    "Kab no rau ib tsoom phauj yawg laus."

Lub sib hawm tus mej koob tsab luam yeeb ntawd tus txiv cob txheeb teb zoo li no:

    "N . . .(Hais niam thiab txiv, txiv ze txiv ntxawm, nus tij nus kwv, thiab phauj dab laug) tau lawm lau."

Mej koob tsab luam yeeb meej ces nws thiaj li ua nriav lus hais rau txiv cob txheeb tias:

    "Hais rau koj tus ua niam ua txiv. Hnub no wb tuaj no yog wb yuav tuaj nrog niam txiv tom no xaus tshoob xaus kos. Wb tuaj nrog niam txiv tom no tis kev ntsuab kev ze. Wb tuaj no wb tsis tuaj nrog niam txiv tom no cog ib rev paj los sis tsuab ib rev pos. Koj ho hais rau niam thiab txiv kom nkawd ho mam lub xeeb thiab. Wb tuaj no yog wb yuav tuaj nrog niam nrog txiv ntsuas dej ntsuas txhuv xwb no mog."

Mej koob hais ntxiv li no:

    "Nqe ib, ua li niam thiab txiv cov kwv cov tij uas yuav tuaj nrog niam txiv sab laj tshoob ua li puas tau tuaj txhij li cas rau li cas? Yog hais tias cov kwv cov tij ho tuaj txhij tuaj txhua lawm los haj yam zoo. Yog ho tshuav tus twg tsis tau tuaj no los niam thiab txiv ho hais rau wb paub. Hnub no vauv tuaj txog lawm ces vauv mam li mus raws tuaj nrog niam txiv sab laj. Nqe ob, hais txog ntawm ob tug tub yuav nrog wb ntsuas dej ntsuas txhuv ne ua li niam thiab txiv puas tau thov tau? Niam thiab txiv thov tau lawm no ces muaj lus ua tsaug. Yog niam thiab txiv thov tsis tau no ces niam thiab txiv ho hais rau wb paub.Niam thiab txiv ho nyiam tus twg no los wb mam li mus thov los tau no mog. Koj ho coj lus rau niam thiab txiv seb niam thiab txiv ho hais li cas?" Ob tug mej koob tib txaum yim.

Txiv cob txheeb los sis tus laus neeg thiaj li txaum yim teb tias:

    "Kuv mam li coj lus mus rau niam thiab txiv seb niam txiv hais li cas."

Nws mus nrog niam niam tham tag ces nws thiaj li los teb rau ob tug mej koob tias:

    "Hais txog ntawm niam thiab txiv cov kwv tij ces kuj tuaj ob peb tug lawm thiab. Tshuav tus twg tsis tau tuaj no los niam txiv mam li hu rau kom tuaj. Tuaj tsawg tus los peb pib mus. Tshuav cov mam li tuaj los tsis ua li cas. Nqe ob, hais txog ntawm ob tug tub uas yuav nrog neb ntsuas dej ntsuas txhuv ces niam txiv yeej thov tau lawm. Tus thawm ces yog tus no. (Taw tes rau tuam mej koob hauv tsev) Tus lwm ces yog yawg no. (Taw tes rau lwm mej koob hauv tsev) Neb muaj hauj lwm dab tsi neb txib nkawd los tau no nawj." Txiv cob txheeb txaum yim rau ob tug mej koob.

Ob tug mej koob txaum yim teb txiv cob txheeb li no:

    "Muaj lus ua niam ua txiv tsaug xwb lauj mog. Ib pliag yog wb muaj chaw txib no ces wb mam li rub nkawd los nrog wb zaum rooj."

Txuas ntxiv mus rau rub rooj ntos tshoob ntos kos.

Rub Rooj Hais Tshoob

Thaum niam thiab txiv cov kwv tij tuaj txhij lawm ces ob tug mej koob (tshaj mej) thiaj li mus rub ib lub rooj rau ntawm hauv plag. Nkawd rub ob lub rooj zaum rau sab pem toj. Ob tug mej koob kuj rub ob lub rooj zaum rau nram qab rooj thiab. Ob tug tshaj mej thiaj li nqa luam yeeb mus tsab rau ob tug mej koob hauv tsev kom nkawd los nrog nkawd zaum rooj. Nkawd cev ob tug luam yeeb rau mej koob hauv tsev thiab ua nriav lus hais tias:

    "Kwv luag, txais kab yeeb seb yuam!"

Tus mej koob hauv tsev teb hais tias:

    "Tau lawm los mas. Kuv tau muaj ntau lawm os."

Ob tug tshaj mej txhob tas zog kom cia li txais kab luam yeeb:

    "Txais ma. Kav tsij txais kiag. Tseem kev tseem cai lawm. Kav tsi txais nkaus kab luam yeeb no ma."

Tus mej koob hauv tsev yig tsis dhau ces nws thiaj li txais kab luam yeeb:

    "Yog li ces kuv txais koj tes laid yuam. Khwv koj laid mog."

Tshaj mej thiaj li ua nriav lus hais ntxiv li no:

    "Kwv luag, koj tsis txhob xav li cas. Koj hla los zaum sab pem toj seb yuam. Koj zaum qhov no kiag." Qhia chaw rau ob tug mej koob hauv tsev zaum.

Ob tug mej koob hauv tsev los zaum rau sab pem toj lawm ces ob tug mej koob tom ub thiaj li los zaum tuaj sab nram qab rooj. Ob tug tshaj mej thiaj li teev cawv rau hauv plaub lub khob. Nkawd thiaj li ib leeg tsaws ob khob cawv rau ob tug mej koob hauv tsev:

    "Txais cawv seb yuam, ob tug kwv luag."

Ob tug txum mej teb tias:

    "Tau lawm los mas. Txais koj tes laid yuam."

Ob tug txum mej thiaj li txais cawv los txawb rau ntawm nkawd xub ntiag. Nkawd faib ib leeg ib khob cawv rov qab rau ob tug tshaj mej:

    "Ib leeg yuav ib lub cawv seb yuam."

Ob tug tshaj mej thiaj li txais ib leeg ib khob cawv los tuav ntawm tes. Nkawd thiaj li coj ob tug txum mej haus ib zeeg cawv:

    "Haus cawv seb yuam, kwv luag. Peb haus ib zeeg cawv meej tso. Wb muaj lus dab tsi los wb mam li hais rau neb yuam."

Ua ntej ob tug txum mej yuav haus ob khob cawv nkawd sawv txaum yim ua ob tug tshaj mej tsaug cawv:

    "Ua tsaug cawv nawj mog. Neb tsis cia li. Neb tseem yuav siv dej siv cawv thiab. Txob xeeb neb xwb mog."

Ob tug tshaj mej teb ob tug txum mej tias:

    "Ua tsaug dab tsi na. Ib pas nyuag cawv qaub yaug ncauj xwb tsis tas ua tsaug mog. Nkim neb lo tsaug xwb os mog, ob tug kwv luag."

Sawv daws haus cawv meej ces ob tug tshaj mej rov qab teev cawv rau hauv plaub lub khob. Ob tug tshaj mej rov tsaws cawv rau ob tug txum mej. Thaum ob tug txum mej txais cawv lawm no ces ob tug tshaj mej thiaj li ua nriav lus hais rau ob tug txum mej li nram no:

    "Hais rau neb ob tug kwv luag, hnub no wb tuaj no yog wb tuaj nrog niam txiv tom no ntos tshoob ntos kos, tis kev ntsuab kev ze. Niam txiv tom ub khom vam wb ob tug. Niam txiv tom no los kuj khom vam txog neb ob tug. Peb plaub tug ua niam txiv tom ub tom no xov ntxiv xov xaws. Peb tsuas yog ua nyog luag cwj nrig dhau dej, ua luag luag dhau zoov. Tog tau nyiaj yog niam txiv tom no. Tog tau neeg yog niam txiv tom ub. Hnub no wb tuaj txog niam txiv tsev tom no, wb yuav tuaj muab neb ob tug kwv luag ua niam ua txiv, hos wb ua me tub me nyuam xwb. Wb paub los wb tsuas paub txij wb teb wb chaw xwb. Wb tso siab rau neb ob tug kwv luag xwb. Neb pom tias qhov twg yuav txhaum los thov neb qhia rau wb paub thiab. Yog hais tias neb pom tias yuav txhaum tab sis neb tsis qhia rau wb paub. Wb txhaum ces neb nrog wb txhaum thiab nawj, ob tug kwv luag."

Ob tug txum mej teb tias:

    "Tej laus piv txoj lus tias qhua tuaj qhua hlob. Wb xav hais tias cia neb ob tug tuaj nraud tuaj ua txiv es cia wb ua maum xwb no."

Ob tug tshaj mej hais ntxiv tias:

    "Lub koob qhua tuaj qhua hlob tiag lau. Tab sis wb los kuj tsis paub dab tsi thiab. Wb paub los wb tsuas paub txij wb teb wb chaw xwb. Thov rau neb ob tug thiab. Cia wb ua maum hos neb ua txiv. Hnub qab nram lub ntsis wb ho tuaj hauv neb tuaj nraud. Wb mam li ho ua txiv hos neb mam li ua maum. Neb tus txiaj ntsha txiaj ntsim wb yuav ris raws rau ntawm nraub qaum tsis tso pov tseg limog, ob tug kwv luag."

Ob tug txum mej thiaj teb li no:

    "Hais mas hais li ntawd. Tab sis cia peb plaub tug ua maum thiab ua txiv tib si. Qhov twg wb pom tias neb ua yuav txhaum no wb mam li qhia rau neb. Yog qhov wb ho tsis paub thiab no los peb plaub twg mam li haus cawv xwb los mas."

Tshaj mej thiaj li hais kom lawv haus ib lub cawv khawm pib:

    "Yog li no ces peb sawv daws kab lub cawv no. Lub cawv no yog ib lub cawv khawm pib nawj. Neb ob tug kwv luag neb tsis txhob tso wb pov tseg thiab nawj."

Txum mej khaws khob cawv los haus:

    "Ua li ntawd los mas. Yog hais tias wb tsis khiav mas neb ob tug kwv luag tsis txhob khiav od. Yog hais tias wb khiav thaum twg lawm no ces neb khiav los tau thiab nawj."

Plaub tug mej koob thiaj li haus lub cawv khawm pib kom meej. Ob tug tshaj mej rov teev cawv rau cov khob. Nkawd tsaws cawv rau ob tug txum mej. Ob tug tshaj mej thiaj li hais nqe ob ntxiv li no:

    "Hais rau neb ob tug kwv luag. Ob xyoos nram ntej peb plaub tug yog yawm yij yawm dab los sis yog txiv tub. Hnub no peb plaub tug tuaj rau ntawm niam txiv lub rooj tshoob rooj kos no. Wb yuav muab neb ob tug hu ua kwv yaig kwv luag xwb. Thov neb tsis txhob xav li cas mog. Dhau rooj tshoob rooj kos no lawm peb mam li rov qab sib hu raws peb txoj kev sib txheeb mog. Wb muab neb hu ua kwv luag. Neb muab wb hu ua kwv luag. Thov neb tsis txhob xav li cas mog, ob tug kwv luag."

Ob tug txum mej teb tias:

    "Tsis muaj dab tsi os. Hnub no peb tuaj ua niam txiv tom ub tom no cwj nrig mus dhau dej, ua luag luag mus dhau zoov. Peb ua kwv yaig kwv luag kom dhau niam txiv lub rooj tshoob rooj kos. Peb mam li rov qab hu raws kev sib txheeb los yeej zoo kawg. Wb kuj tsis xav li cas thiab."

Ob tug tshaj mej thiaj li coj ob tug txum mej kab lawv plaub khob cawv:

    "Peb kab cawv kom meej seb yuam."

Plaub tug mej koob thiaj li kab lawv cov cawv kom meej. Kab cawv meej lawm ces ob tug tshaj mej thiaj li rov qab teev cawv rau hauv cov khob. Ob tug tshaj mej thiaj li tsaws cawv rau ob tug txum mej:

    "Hais rau neb ob tug kwv luag. Wb xav thov qiv niam txiv ib lub me rooj rau peb siv. Muaj hauj lwm lawm tom ntej los wb thiaj li zoo ntos. Neb pab nug rau niam rau txiv seb niam txiv puas muaj rooj. Yog niam txiv ho hais tias peb siv lub no xwb no los muaj lus ua niam txiv tsaug. Hos yog niam txiv ho yuav kom peb pauv no los peb mam li pauv." Sawv tsees txaum yim rau ob tug txum mej.

Ob tug txum mej txais yim thiab teb tias:

    "Cia wb mam li ntxig nug rau niam thiab txiv seb niam txiv ho hais li cas. Yog niam txiv kav qhov ncaj no ces peb cia li siv lub rooj no xwb. Yog niam txiv ho tias niam txiv tsis muaj rooj no ces tej zaum peb yuav tau tsim rooj nawj. Neb ua siab ntev nyob tos mog ob tug kwv luag." Ob tug txum mej sawv tsees.

Ob tug tshaj mej hais ntxiv tias:

    "Neb laj khiav xwb mog ob tug kwv luag."

Txum mej mus nrog niam txiv hauv tsev sib tham meej ces nkawd rov qab los. Nkawd los txog ntawm lub rooj ces nkawd txaum yim hais rau ob tug tshaj mej tias:

    "Neb laj tos ob tug kwv luag."

Tshaj mej teb hais tias:

    "Neb laj tis ntoj kev xwb mog ob tug kwv luag."

Ob tug txum mej coj ob tug tshaj mej tub cawv ib lwm. Sawv daws tub cawv meej ces ob tug txum mej thiaj li ua nriav lus hais li no:

    "Ob tug kwv luag, neb cia cia siab rau wb los wb twb pab tsis tau neb dab tsi mog. Niam txiv hais li no: tus ntxhais no yog niam txiv tus ntxhais hlob mas niam txiv xav kom peb plaub tug pab niam txiv tsim lub nyuag rooj. Yog peb plaub tug tsis tsim ces niam txiv yeej tsis muaj lub rooj rau peb ntos tshoob ntos kos li no. Neb ob tug kwv luag txhob xav li cas thiab. Kuj tsis yog tias wb yuav ua nruab neb ob tug. Qhov no yog niam txiv nyiam tsum lawm ces peb yuav tau ua. Peb txawj li cas los peb ua li cas." Ib txaum yim rau ob tug tshaj mej.

Tus nus tij txav zog los koom plaub tug mej koob. Nus tij sawv tuaj ib tog rooj. Nws hais rau plaub tug mej koob li no:

    "Hais rau nej plaub tug mej koob, nej tsis txhob xav li cas. Hnub no niam txiv xav kom peb pab tsim niam txiv lub rooj tshoob rooj kos xwv nej plaub tug thiaj li tau lub chaw dauv tes. Tus ntxhais no yog niam txiv tus ntxhais hlob. Niam txiv xav ua kom raws li poj ua tseg yawm ua cia. Kuv tsis yog yuav txhob txwm nruab nej plaub tug. Niam txiv nyiam tsum lawm ces peb txawj li cas peb yuav tau ua raws li qhov peb paub xwb mog. Kuv sawv tshaj nej plaub tug mej koob nawj mog." Txaum yim liag rau plaub tug mej koob thiab pib hais zaj nus tij zais rooj tshoob.

Nus tij hais zaj xaus ces nus tij ua nriav lus ntxiv rau plaub tug mej koob li no:

    "Hais rau nej plaub tug, niam txiv tom no yeej tsis muaj rooj li. Nej ua tiag pab tsim niam txiv lub rooj tshoob no mog." Nus tij tawm nrug deb ntawm plaub tug mej koob.

Ob tug txum mej thiaj li sawv tsees txaum yim rau ob tug tshaj mej:

    "Ob tug kwv luag, wb sawv tshaj neb laid yuam." Txum mej thiaj li pib hais zaj txum mej zais rooj tshoob.

Txum mej hais zaj xaus ces ob tug tshaj mej thiaj li hais zaj taug noob xyoob noob ntoo thiab zaj txua rooj tshoob. Raws li txoj cai tiag mas ob tug tshaj mej hais zaj taug noob xyoob noob ntoo. Ob tug txum mej yuav tsum tau hais zaj txua rooj.

Plaub tug mej koob tsim tau lub rooj lawm ces ob tug txum mej thiaj li cev plaub khob cawv rau ob tug tshaj mej:

    "Hais rau neb ob tug kwv luag paub. Niam txiv lub rooj ces yog lub no xwb. Neb muaj chaw siv los neb siv tau ntag no nawj."

Ob tug tshaj mej haus plaub khob cawv meej. Nkawd rov teev cawv rau hauv khob thiab tsaws rau ob tug txum mej. Nkawd mam li pib nug txog lus txeej lus xuam.

Ntos Thawj 2 Nqe Lus

Ob tug tshaj mej tsaws cawv rau ob tug txum mej. Ib tug tshaj mej thiaj li ua nriav lus hais rau ob tug txum mej li no:

    "Hais rau neb ob tug kwv luag. Tav no niam txiv tom ub khom vam txog wb ob tug. Niam txiv tom no los kuj khom vam txog neb ob tug. Peb plaub tug tuaj ua niam txiv tom ub tom no cwj nrig mus dhau dej, ua luag mus dhau zoov. Tog tau nyiaj ces yuav yog niam txiv tom no. Tog tau neeg ces yuav yog niam txiv tom ub. Peb plaub tug tsuas yog tau plaub khob cawv zov rooj xwb. Niam txiv tom no txib neb tag los wb kuj yuav txib neb thiab mog ob tug kwv luag. Neb ob tug kwv luag tsis txhob xav li cas." Ob tug tshaj mej thau ob puas duas las nyiaj los tso rau saum rooj. Tshaj mej thiaj li hais ntxiv li no:

    "Ob tug kwv luag, neb coj lus rau niam rau txiv. Niam txiv tom ub tso ob me nplooj no muas niam txiv tom no ib puas txoj cai ke txhaum txheej. Neb pab nqa mus rau niam rau txiv tom no. Niam txiv txawm tsis khaws los thov kom khaws. Kuj tsis tau txhais hais tias yog niam txiv khaws lawm ces yuav tsis pub niam txiv hais. Niam txiv muaj lus dab tsi los niam txiv kuj tseem hais tau thiab no nawj mog, ob tug kwv luag. Neb ua tiag pab coj lus mus rau niam thiab txiv kom niam thiab txiv ho zam ib txog kev dav pub rau nraug vauv thiab no mog."

Ob tug txum mej teb li no:

    "Wb mam ho coj lus rau niam txiv seb niam txiv hais li cas. Ob me nplooj no ces tso nws nyob nws saum lub rooj no. Yog niam txiv hais tias niam txiv khaws no ces wb mam li nqa mus rau niam txiv. Niam txiv ho hais tias kev neej kev tsav tshiab tshiab niam txiv tsis xav khaws no los wb mam li muab rov qab rau neb ob tug kwv luag. Kuv xav li no yuam, neb ntos ib-ob nqe lus ntxiv thiab tso wb mam li ua ib zaug mus sab laj rau niam thiab txiv yuam, ob tug kwv luag."

Ob tug tshaj mej thiaj li pib ntos thawj nqe lus rau ob tug mej koob hauv tsev kom nkawd coj lus mus laj niam laj txiv:

    "Hais rau neb ob tug kwv luag. Tav no niam txiv tom ub khom vam txog wb ob tug. Niam txiv tom no los kuj khom vam txog neb ob tug. Peb plaub tug tuaj ua niam txiv tom ub tom no cwj nrig mus dhau dej, ua luag mus dhau zoov. Tog tau nyiaj nws muaj nws. Tog tau neeg nws kuj muaj nws. Peb tsuas yog tsam lub yeej cawv qhuav qhuav xwb. Niam txiv tom no txib neb tag los wb kuj yuav txib neb thiab mog ob tug kwv luag. Neb ob tug kwv luag tsis txhob xav li cas. Neb mus ntxig nug rau niam rau txiv tom no. Nqe ib, ua li niam txiv tus tub tus ntxhais no puas muaj muam phauj yawg laus tuaj cuam tshuam? Yam daim teb puas tau muaj neeg xub tuaj aws. Yog hais tias tsis tau muaj neeg tuaj cuam tshuam no ces yog peb tub peb nyab xwb. Hos yog ho twb muaj muam phauj txiv dab laug tuaj cuam tshuam tseg lawm no los thov niam txiv hais los qhia rau wb paub. Dub qhov twg los wb yuav tuaj ntxhua kom dawb. Ntuag qhov twg los wb yuav ntxiv rau kom ntom. Txaus chawj wb yuav mus chawj, txaus thov los wb yuav mus thov xwv kom peb tau neej tau tsav. Kom niam txiv ob tog tsis txhob muaj chaw tu siab." Sawv tsees ib txaum yim rau ob tug txum mej koob.

Ob tug tshaj mej hais ntxiv nqe ob li no:

    "Nqe ob, ua li tus tub thiab tus ntxhais kev ua nkauj ua nraug puas muaj yam tau ua siab niam siab txiv, siab neej nus li cas rau li cas? Niam txiv tsis txhob ua kauv tshus zoov, tshws zais nas. Niam txiv yeej meem phua plhawv los ntag. Hnub no wb tuaj niam txiv tsev tom ub tuaj. Tau roj wb li rhais, tau lus wb li hais. Qab los wb yuav noj. Qaub los wb yuav noj. Iab los wb yuav noj. Sib wb ua ib tsuag nqa. Hnyav wb ua ib tsuag ris. Dub qhov twg los wb yuav tuaj ntxhua. Ntuag qhov twg wb yuav tuaj ntxiv. Neb ob tug kwv luag, xyuam tsis nyog lub laj khwv los neb ua tiag mus ntxig nug rau niam txiv seb niam txiv ho hais li cas." Rov qab sawv tsees ib txaum yim rau ob tug mej koob hauv tsev.

Ob tug txum mej sawv txais yim. Nkawd hais rau ob tug tshaj meej li no:

    "Wb mam li coj lus rau niam thiab txiv seb niam txiv ho hais li cas. Yog hais tias ho tsis tau muaj muam phauj txiv dab laug tuaj cuam tshuam ces yeej yog nej tub nej nyab xwb ntag lau! Neb ua siab ntev tos mog ob tug kwv luag."

Ob tug tshaj mej sawv tsees txais yim:

    "Neb laj khiav xwb mog ob tug kwv luag."

Txum mej mus sab laj nrog niam txiv hauv tsev tham meej ces nkawd thiaj li rov qab los. Nkawd los txog ntawm lub rooj ces nkawd txaum yim liag rau ob tug mej koob zaum ntawm rooj:

    "Laj tos od ob tug kwv luag."

Ob tug mej koob nyob ntawm lub rooj teb tias:

    "Laj khiav xwb mog ob tug kwv luag."

Plaub tug mej koob nyias rov zaum nyias qhov chaw. Ib tug txum mej thiaj li ua nriav lus hais rau ob tug tshaj mej li no:

    "Hais rau neb ob tug kwv luag. Niam txiv hais li no: hais txog ntawm neb ob nqe lus ces niam txiv tsis tau teb no nawj. Hnub no neb tuaj niam txiv tsev tom ub tuaj. Puas yog neb pom niam txiv tom no tsev vuas zoo sim zeb, tsev nqeeb zoo sim taws es neb thiaj li tuaj. Neb noj nceb ne ua li neb puas taug cav? Ua tshoob ua kos ne neb puas taug kev neej kev tsav thiab? Niam tw neb puas suab? Txiv kub neb puas ntoo? Ua li puas yog niam txiv kom neb tuaj los yog neb tuaj neb xwb? Neb ho hais rau wb ob tug. Wb mam li hais rau niam txiv kom niam txiv thiaj li nyab xeeb." Ib txaum yim rau ob tug tshaj mej.

Ob tug tshaj mej lees hais tias:

    "Hais rau neb ob tug kwv. Neb coj lus nraim rau niam txiv tom no tias niam kub wb yeej ntoo. Txiv tw los wb suab tib si no nawj. Wb nyob niam txiv tawb ces quaj xws niam txiv noog. Nyob niam txiv nkuaj ces rag xws niam txiv nees. Hnub no wb tuaj mas yeej yog niam txiv tom ub tau tuaj thov wb dag wb zog wb thiaj li tuaj. Wb tuaj  txog niam txiv tsev tom no, niam txiv tsev vuas tsis yog wb chaw sim zeb. Niam txiv tsev nqeeb tsis yog wb chaw sim taws. Neb hais rau niam rau txiv kom niam txiv mam lub xeeb. Luag hais tias noj nceb ces yuav taug cav. Ua tshoob ua kos ces yuav nrhiav neej nrhiav tsav. Hnub no wb tuaj yog wb tuaj nrog niam txiv tom no tis ntsuab tis ze. Wb yuav tuaj nrog niam txiv tom no txuas tshoob txuas kos. Wb tsis yog yuav tuaj nrog niam txiv tom no cog ib rev paj los sis ib rev pos no mog, ob tug kwv luag. Neb coj lus nraim rau niam txiv kom niam txiv ho mam lub xeeb no mog." Tshaj mej txaum yim rau ob tug txum mej.

Ob tug txum mej hais ntxiv li no:

    "Puas muaj tseeb tiag mas ob tug kwv luag. Nyob tsam neb lam ntxias wb nce nthab es neb lauj taw ntaiv nev. Tsam neb pom niam txiv tom no tsev vuas zoo sim zeb, tsev nqeeb zoo sim taws. Neb lam tuaj ua suav sim niam txiv xwb nev."

Tshaj me lav lus hais tias:

    "Ob tug kwv luag, luag hais tias tseeb ua tsis t au cuav, cuav ua tsis tau tseeb. Wb meem nyog tsheej tab lav nyog tsheej tsw ntag. Yog hais tias wb ntxias neb nce nthab lauj neb taw ntaiv los tsis ntshai. Neb loj zog wb npab ntug ntag. Loj zog npab ntug tsis tau ces chaws ntswg kiag xwb ntag no nawj."

Ob tug txum mej li no:

    "Wb yuav neb lus thiab. Yog neb ntxias wb nce nthab lauj wb taw ntaiv no ces wb chaws ntswg kiag xwb od, ob tug kwv luag."

Mej koob tom ub teb hais tias:

    "Ua li kiag ntag lauj ob tug kwv luag."

Ob tug mej koob hauv tsev thiaj li hais nqe txuas ntxiv li no:

    "Hais rau neb ob tug kwv luag. Niam txiv xav paub tias ua li ne yam lub nra niam txiv txo los sib neb thiaj ris. Hnyav neb ho yuav tsis ris. Yam tais qav uas qab neb thiaj li noj. qaub thiab iab ces neb yuav tsis noj. Los yog txawm sib txawm hnyav los neb yeej yuav ris. Txawm qab, qaub, iab los neb yeej yuav noj vom, los neb tsis noj. Niam txiv xav paub tseeb seb neb yuav hais li cas?"

Ob tug tshaj mej thiaj li teb tias:

    "Neb coj lus nraim rau niam txiv hais tias qab los wb noj. Qaub los wb yuav noj. Iab los wb yuav noj. Sib wb ua ib tsuag nqa. Hnyav wb ua ib tsuag ris. Hnub no wb tuaj niam txiv tsev tom ub tuaj, niam txiv tom no dub qhov twg los wb yuav ntxhua kom huv. Ntuag qhov twg los wb yuav ntxiv rau kom ntom ntag. Niam txiv muaj lus dab tsi los niam txiv yeej phua plhawv los ntag no nawj, ob tug kwv luag."

Txum mej nug seb ua li puas yog ob tug tshaj mej hais tiag los dag:

    "Ob tug kwv luag, ua li neb puas yuav meem nyog tsheej tab, lav nyog tsheej tim. Yam lub nra niam txiv txo plhuav los sib neb thiaj li txais. Hnyav neb ho tso tes khiav nev neb ho yuav hais li cas mas, ob tug kwv luag?"

Tshaj mej lav tsheej tab tsheej tim tias:

    "Wb meem nyog tsheej tab, lav nyog tsheej tim ntag. Lub nra niam txiv txua plhuav los sib los wb yuav nqa. Hnyav los wb yuav nqa. Yog hais tias sib wb thiaj li txais. Hnyav wb ho yuav tsis txais no los neb ob tug kwv luag loj zog wb npab ntug los sis chaws ntswg kiag ntag. Tseeb yeej ua tsis tau cuav. Cuav yeej ua tsis tseeb mog ob tug kwv luag."

Ob txug mej thiaj li kom lawv haus ib lub cawv khawm pib hais lus khawm yim:

    "Neb meem nyog tsheej tab, lav nyog tsheej tim tiag no ces peb haus ib lub cawv khawm pib. Hais lus mas kom nco lus. Haus dej mas kom nco dej laiv ob tug kwv luag. Lub nra niam txiv txo plhuav los hnyav neb ho tsis txais ses wb ntsiab nkaus neb npab ntug ntag nawj."

Ob tug tshaj mej lees kiag:

    "Ua li ntag, ob tug kwv luag. Peb sawv daws yuav cawv khawm pib seb yuam. Yog lub nra niam txiv txo los hnyav wb ho tso tes khiav no neb ntsiab nkaus wb npab ntug xwb ntag. Ntsiab tsis tau los chaws ntswg kiag xwb ntag ob tug kwv luag."

Plaub tug mej koob thiaj li haus ib lub cawv khawm pib.

Ntos Txog Lub Xo

Plaub tug mej koob haus cawv khawm pib meej ces ob tug tshaj mej thiaj li sau cov khob los tso ntawm nkawd xub ntiag. Nkawd thiaj li teev cawv rau hauv cov khob. Ob tug tshaj mej tsaws cawv rau ob tug txum mej. Nkawd thiaj li ua nriav lus hais ntxiv li no:

    "Ob tug kwv luag, niam txiv txib neb tag los wb kuj yuav txib neb thiab. Neb tsis txhob xav li cas. Luag hais tias tog tau nyiaj nws muaj nws. Tog tau neeg nws muaj nws. Peb plaub tug tsuas yog tsam lub yeej cawv qhuav qhuav xwb. Neb ob tug kwv luag ua lub siab ntev nrog wb laj niam laj txiv mog. Neb mus nrog laj niam laj txiv seb ua li hais txog ntawm lub me xo ne tus tuaj thoob lub xo puas ua raws kev raws cai? Ib qho tuaj, ntawm lub xo ne puas txhij thiab los tsis txhij? Luag hais tias tub txawg muaj tsawg. Tub ruag muaj ntau. Tus tuaj thoob lub xo ho ua tsis raws kev li los kom niam txiv hais los rau wb. Txaus ntxiv los wb yuav tuaj ntxiv rau kom peb tau kev neej kev tsav. Txaus ntxiv los wb yuav ntxiv, txaus thov los wb yuav thov no mog, ob tug kwv luag. xyuam tsis nyog neb lub laj khwv lau! Neb ua tiag pab ntxig nug rau niam txiv seb niam txiv ho hais li cas mog." Tshaj mej ib txaum yim rau ob tug mej koob hauv tsev.

Ob txum mej sawv txais yim thiab teb hais tias:

    "Wb mam li mus laj niam laj txiv seb niam txiv ho hais li cas. Neb ua siab ntev tos mog ob tug kwv luag."

Ob tug tshaj mej teb hais tias:

    "Laj khiav mog ob tug kwv luag."

Txum mej thiaj li mus nrog niam txiv hauv tsev sib tham seb ua li tus tuaj thoob lub xo ua puas raws kev raws cai. Tus thoob lub xo puas pom neej pom tsav txhua. Nws puas tsab yeeb txhua rau niam txiv, niam hlob txiv hlob, niam ntxawm txiv ntxawm, nus tij thiab nus kwv sawv daws. Hais txog ntawm cov nyiaj thoob lub xo ne puas txwm li sawv daws niaj hnub siv. Sab laj tag ces ob tug txum mej thiaj li coj lus los rau ob tug txum mej.

Yog hais tias niam txiv tsis ua nyuaj los sis tus thoob lub xo yeej muab lub xo raws li txoj kab txoj kev lawm no ces niam txiv tsis hais dab tsi. Niam txiv tsuas kom ob tug mej koob los hais li no rau ob tug mej koob tom ub:

    "Hais rau neb ob tug kwv luag. Neb nqi lus nug txog ntawm lub me xo ntawd niam txiv hais li no: tus tuaj thoob lub xo yeej ua tau raws kab raws kev lawm. Niam txiv tsis muaj chaw tib dab tsi li no mog." Ib txaum yim rau ob tug mej koob tom ub.

Txum mej thiaj li hais ntxiv txog thawj ob nqe lus li nram no:

    "Niam thiab txiv ho teb txog ntawm neb ob nqe lus ua ntej ntawd. Nqe ib, ua li puas muaj muam phauj yawg laus tuaj cuam tshuam? Niam txiv hais li no: yeej tsis muaj no nawj. Kom niam txiv tom ub mam lub xeeb no mog. Muaj ces tsuas yog tus vauv no xwb mog." Ib txaum yim rau ob tug tshaj mej. "Nqe ob, hais txog kev ua nkauj ua nraug puas siab niam siab txiv? Niam txiv hais li no: tej tub tej ntxhais txawm ua nkauj ua nraug li cas los niam txiv yuav tsis hais no nawj. Nws ua tau yuav tau ces niam txiv tsis hais dab tsi no nawj. Hnub qab nram lub ntsis niam txiv tsev tom no ho tuaj yuav rau niam txiv tsev tom ub los thov niam txiv tom ub tsis txhob ua nyuab no mog. Cov tub cov ntxhais lawv txawj ua tau thiab sib yuav tau ces kom cov ua niam ua txiv tsis txhob rub ua kev ua cai no mog. Ib qho ntxiv tuaj, hais txog ntawm neb ob me nplooj ntawv uas neb tso saum lub rooj no ces niam txiv tsis tau tau khaws no nawj. Txog caij niam txiv yuav khaws no ces niam txiv mam li khaws. Hos yog niam txiv tsis khaws no los niam txiv mam li hais neb paub no mog ob tug kwv luag."

Ob tug tshaj mej thiaj li teb li no:

    "Muaj lus ua niam txiv tsaug mog ob tug kwv luag. Ib puas las nyiaj muas tsis tau niam txiv ib lo lus nyiaj lus kub lauj mog. Niam txiv hais ces yog niam txiv lus kawg li lawm lau. Hnub qab nram lub ntsis niam txiv tom no ho tuaj xeeb txog niam txiv tom ub. Tau tus tub txawj ua raws kev raws cai, tsab yeeb tsab tshuaj, tsab nyiaj tsab nco txhua niam txiv neej nus los haj yam zoo. Ho tau tus tub ruag ua tsis raws kev raws cai los niam txiv tom ub yuav tsis muab rub ua kev ua cai thiab no mog. Yog hais tias niam txiv tom ub tseem yuav rub ua kev ua cai, nplua ub nplua no thiab no los tsis ntshai. Niam txiv tom ub tus coj tshoob N . . . ua tus lav hais no nawj. Yam lub lauj kaub dej, pub kom niam txiv tom no lub twb npau lawm mas niam txiv tom ub lub mam li xi no nawj. Yog hais tias niam txiv tob ub tus coj tshoob N . . . hais tsis tau nws cov kwv tij nws mam li ua tus tso kheej. Niam txiv tom no ces tsuas cia li ua tshoob ua kos xwb no nawj." Ob tug tshaj mej ib txaum yim rau txum mej.

Ob tug tshaj mej hais ntxiv li no:

    "Hais txog ntawm nqe tias puas muaj muam phauj yawg laus tuaj cuam tshuam. Tus ntxhais no ho tsis tau muaj leej twg tuaj cuam tshuam ces yeej yog peb tub peb nyab xwb no nawj. Muaj lus ua niam ua txiv tsaug no mog. Ho hais txog kev ua nkauj ua nraug. Muaj tseeb tiag lau, tej hluas nyob teb chaws no ua nkauj ua nraug ces yeej tsis ntshai siab niam siab txiv li. Tsuav yog nws ua tau yuav tau xwb ces yog zoo kawg li lawm. Hnub qab nram lub ntsis niam txiv tom no ho tuaj xeeb txog niam txiv tom ub. Tej tub tej ntxhais ho tsis txawj ua nkauj ua nraug los niam txiv tom ub yuav tsis muab rub ua kev ua cai thiab no mog. Tsuav yog lawv ua tau yuav tau ces niam txiv yuav tsis hais dab tsi thiab. Yog hais tias niam txiv tom ub tseem yuav rub ua kev ua cai, nplua ub nplua no, thiab no los tsis ntshai. Wb ob tug tuam mej koob lwm mej koob mam ua tus lav hais no nawj. Yam lub lauj kaub dej, pub kom niam txiv tom no lub twb npau lawm mas niam txiv tom ub lub mam li xi no nawj."

Ntos Lus Xeej Lus Xuam

Ob tug tshaj mej thiaj li ntxig nug txog lus nkhib lus nkhaus, lus xeej lus xuam li no:

    "Ob tug kwv luag, wb txib neb tag los yuav rov txib neb dua thiab. Neb tsis txhob xav li cas. Tav no luag hais tias daim teb tsis luaj ces nroj yuav tuaj. Lus tsis hais ces tshoob kos yuav tsis meej. Neb mus ntxig nug rau niam txiv seb ua li niam txiv tsev neeg no thiab niam txiv tom ub puas tau noj dua nqaij daig dab, haus cawv daig nru lub neej yav dhau los? Niam txiv puas muaj lus nkhib lub nkhaus li cas rau li cas? Niam txiv muaj lus txeej lus xuam li, lus chawj lus chim cas los kom niam txiv hais los rau wb. Niam txiv tsis txhob ua kauv tshus zoov, tshws  zais nas. Niam txiv yeej meem phua plhawv los ntag. Dub qhov twg los wb yuav tuaj ntxhua kom huv. Ntuag qhov twg los wb yuav tuaj ntxiv kom ntom. Niam txiv muaj lus li cas los thov niam txiv hais rau neb ob tug. Neb ho muab lus rau wb no mog, ob tug kwv luag."

Mej koob hauv tsev thiaj li teb tias:

    "Wb mam li mus ntxig nug rau niam txiv seb niam txiv puas ho muaj lus li cas. Ob tug kwv luag, neb ua siab ntev tos mog."

Ob tug mej koob tom ub teb tias:

    "Laj khiav xwb mog ob tug kwv luag."

Ob tug mej koob hauv tsev mus nrog niam txiv tham seb niam txiv puas muaj lus nkhib lus nkhaus, lus dua lus dim thiab lus xeej lus xuam li cas. Tob qab ob tug mej koob nrog niam txiv tham meej lawm ces nkawd thiaj li rov qab los rau ntawm lub rooj. Nkawd los txog nrawm lub rooj ces nkawd txaum yim rau ob tug mej koob tom ub tias:

    "Neb laj tos mog ob tug kwv luag."

Ob tug tshaj mej teb tias:

    "Laj khiav xwb mog ob tug kwv luag."

Ntos txog nqi niam txiv tom ub tsis pub tus tub yuav tus ntxhais.

Lus Xuam - Nqe 1

Txum mej thiaj li coj ob tug tshaj mej tub cawv ib lwm. Ob tug txum mej thiaj li ua nriav lus hais rau ob tug tshaj mej li no:

    "Hais rau neb ob tug kwv luag, neb vam vam wb mus laj niam laj txiv los kuj tsis tau niam txiv ib lo lus nyiaj lus kub li. Tsuas yog tau niam txiv lo lus nkhib lus nkhaus xwb. Niam txiv hais li no, ua li niam txiv tom ub tus coj tshoob coj ko yog leej twg. Niam txiv tom ub tus sawv cev ho yog leej twg thiab. Niam txiv nug no kuj tsis yog yuav nug ua plaub ua ntug los sis nug ua xaiv ua lus. Luag tej laus piv txoj lus tias ib lub zoov muaj ib tug ntoo yiag siab, ib cuab kwv tij yuav tsum muaj ib tug coj. Niam txiv tsuas yog nug kom niam txiv paub hais tias ua li niam txiv tus vauv no yog pab twg ces twg xwb no mog, ob tug kwv luag."

Ob tug tshaj mej thiaj li qhia niam txiv tom ub tus coj tshoob coj kos rau ob tug txum mej:

    "Hais rau neb ob tug kwv luag, neb coj lus nraim rau niam txiv tom no hais tias niam txiv tom ub tus lav tshoob lav kos ces yog N . . . (Hais tus coj tshoob tom ub lub npe). Niam txiv tom ub tus nres rooj tshoob rooj kos no yog N . . . (Hais tus nres tshoob tom ub lub npe). Ob tug kwv luag, niam txiv muaj lus nkhib lus nkhaus li cas los niam txiv yeej meem phua plhawv los ntag no nawj. Nqe lus niam txiv hais tias wb ob tug mej koob lav tau los wb yuav lav ntag. Nqe lus niam txiv hais tias wb lav tsis tau, yuav kom niam txiv tom ub tus coj tshoob coj kos nqes nroos tuaj lav los wb kam tib si no nawj. Ob tug kwv luag, xyuam tsis nyog neb lub laj khwv los neb ua tiag nrog wb mus laj niam laj txiv seb niam txiv puas muaj lus nkhib lus nkhaus li cas los kom niam txiv phua plhawv los ntag no nawj. Niam txiv tsis txhob ua kauv tshus zoov, tshws zais nas no mog." Ob tug tshaj mej sawv tsees txaum yim rau txum mej.

Mej koob hauv tsev sawv txais yim.  Ob tug txum mej coj sawv daws tub cawv ib lwm. Nkawd thiaj li pib ntos cov lus xeej lus xuam li no:

    "Hais rau neb ob tug kwv luag, neb vam vam wb mus laj niam laj txiv los kuj tsis tau niam txiv ib lo lus nyiaj lus kub li. Tsuas yog tau niam txiv lo lus nkhib lus nkhaus xwb. Niam txiv hais li no, nqe 1, niam txiv hnov tias tus tub no cov kwv tij tsis tshua xav cia tus tub yuav tus ntxhais. Vim tus tub cov kwv tij tib tias tus ntxhais twb zoo nkauj tsis pim tus tub. Yog li no niam txiv kuj tau hnyav siab tias tsam yog niam txiv tus ntxhais pom tus vauv no dua qab vag tsib taug es tus ntxhais cia li raws tus vauv xwb. Hnub no nej coj niam txiv tub niam txiv ntxhais tuaj txog vaj txog tsev lawm ces niam txiv yuav tsis hais dab tsi lawm. Nej txawj tuaj los txawj rov no nawj, ob tug kwv luag." Ob tug txum mej sawv tsees txaum yim liag rau ob tug tshaj mej.

Ob tug tshaj mej sawv txais yim. Sawv daws rov qab zaum. Ob tug tshaj mej thiaj coj sawv daws haus cawv ib lwm. Ob tug tshaj mej thiaj li teb li no:

    "Ob tug kwv luag, niam txiv hais ces yog lus nyiaj lus kub lauj mog. Ib puas laj nyiaj muas tsis tau niam txiv lo lus nyiaj lus kub. Ob tug kwv luag, neb coj lus nraim rau niam txiv tom no kom niam txiv ho mam lub xeeb. Hais txog nqe lus no tej zaum kuj yuav muaj tseeb thiab los niam txiv tom ub kuj tsis paub. Yog hais tias tsis muaj kiag tej zaum niam txiv tom no kuj ho yuav tsis hnov thiab. Hnub no niam txiv tom ub rooj tag los qhib, rooj txuas los qhib. Hais txog qhov niam txiv tom ub thiab cov kwv tij tsis pub tus tub yuav tus ntxhais no mas tsis muaj no nawj mog, og tug kwv luag. Tej zaum qhua yas ob cag lam hais xwb los kuj tsis paub. Niam txiv tom no tsis txhob me siab tias tsam yog tus ntxhais pom tus tub dua qab vag tsib taug es tus ntxhais cia li caum tus tub. Luag hais tias xyoo no poj tsis taus ces poj yuav yuav nyab. Yawm tsis taus ces yawm yuav yuav nees. Niam txiv tom ub yeej tso lus kom tus hluas txhob txwm tuaj coj niam txiv tom no tus ntxhais hauv niam txiv vaj niam txiv tsev mus ntag no nawj. Nqe no niam txiv tom ub thov lav ib lo lus tseg rau ntawd. Kaj ntug tag kis niam txiv tom no rab hneev yaj kub txeeg tuaj ntsia ntsees niam txiv tom ub qab taw rooj. Tsuj tus roj tshais tus neev li no, hnov luag qhua yas ob cag hais tias niam txiv tsis xav pub tus tub yuav tus ntxhais,  los niam txiv tom ub yuav tsis rub ua kev ua cai dab tsi no nawj. Tsuav yog niam txiv thiab cov kwv tij tsis tau txwv tus tub xwb ces tsis muaj dab tsi. Yog hnub qab nram lub ntsis niam txiv tom no rab hneev yaj kub txeeg tuaj ntsia ntsees niam txiv tom ub qab taw rooj. Tsuj tus roj tshais tus neev no. Niam txiv tom ub tseem muaj tus txhib ntag das yuav yuav nplua npaum ub npaum no kho los tsis ntshai. Niam txiv tom ub tus coj tshoob N . . . (Hais tus coj  tshoob tom ub npe) hais tsis tau nws cuab kwv tij ces nws mam li ua tus tso no nawj. Tsuas pub niam txiv tom no ua tshoob ua kos dawb paug xwb no mog. Pub kom niam txiv tom no lub yias dej xub npau mas niam txiv tom ub lub mam li xi no mog, ob tug kwv luag." Ob tug tshaj mej txaum yim liag rau ob tug txum mej.

Ob tug txum sawv txais yim. Nkawd thiaj li hais li no:

    "Niam txiv tom no kuj hais li no thiab, tav nov hais tias tsis yuav los nej twb yuav niam txiv tus tub tus ntxhais lawm. Niam txiv yeej tsis xav muab nqe lus no los ntos. Tab sis yog vim niam txiv ho hnyav siab hais tias tsam hnub qab nram lub ntsis tus vauv no ho  tsis hlub niam txiv tus tub tus ntxhais. Cia niam txiv tub niam txiv ntxhais noj hno ntxuag kua muag, haus dej ntxuag kua ncauj. Cia niam txiv tub niam txiv ntxhais rau kab theeb tim puam, ua nas qhuav noog nkig. Niam txiv hais li no, niam txiv tus tub tus ntxhais ces yam li ib tshob dej uas niam txiv muab ntov rau hauv av lawm ces niam txiv yuav tsis hais rov qab lawm. Hnub qab nram lub ntsis yog hais tias tus vauv no yeej tsis hlub niam txiv tus tub tus ntxhais tiag. Niam txiv xav kom niam txiv tom ub nraug vauv yawg nrhiav tus vauv no ib tug kwv los tuav thiab hwj xwm tus ntxhais lub neej mus kom txog hnub kawg. Niam txiv tsis xav kom niam txiv tom ub xa niam txiv tus tub tus ntxhais rov qab tuaj rau niam txiv. Neb ob tug kwv luag, neb coj lus nraim rau niam txiv tom ub seb niam txiv tom ub hais hais li cas." Txum mej sawv tsees txaum yim rau ob tug tshaj mej.

Tshaj mej thiaj sawv txais yim. Nkawd thiaj li hais ntxiv tias:

    "Neb ua siab ntev tos mog ob tug kwv luag."

Ob tug txum mej sawv txaum txim teb tias:

    "Neb laj tis ntoj xwb mog ob tug kwv luag."

Mej koob tom ub mus nrog niam txiv sab laj meej ces nkawd rov qab los. Nkawd los txog ntawm lub rooj ces nkawd txaum yim rau ob tug mej koob hauv tsev:

    "Neb laj tos mog ob tug kwv luag."

Mej koob hauv tsev txaum yim teb tias:

    "Neb laj khiav xwb mog ob tug kwv luag."

Ob tug tshaj mej coj ob tug txum mej kab txum pib. Nkawd rov teev cawv rau hauv cov khob. Tshaj mej thiaj li ua nriav lus hais li no:

    "Ob tug kwv luag, wb mus sab laj rau niam rau txiv mas niam txiv hais li no, Hais txog nqe me lus no niam txiv tom ub mam li ua tus lav. Hnub qab nram lub ntsis yog hais tias tus tub yeej tsis hlub tus nyab tiag. Tus tub cia tus nyab noj hno ntxuag kua muag, haus dej ntxuag kua ncauj. Tus tub cia tus nyab rau kab theeb tim puam, ua nas qhuav noog nkig. Yam cev khaub ncaws thaum tshiab nws ho xav hnav. Thaum cev khaub ncaws qub lawm nws ho muab laim pov tseg. Niam txiv tus tub cia li yeej tsis hlub tsis tshua txog tus nyab los tsis ntshai. Niam txiv tom ub nraug vauv yawg mam li nrhiav tus tub no ib tug kwv, los sis tub kwv tub tij, los txis rau tus nyab thiab hlub tus nyab no mus kom kawg qub kawg ntsis. Qhov no mas niam txiv lav tseg li ntawd. Tab sis niam txiv tom ub yuav tsis pub kom tus tub no ua li ntawd rau niam txiv tom no tub ntxhais. Txoj hauv hlua niam txiv tom ub yuav nrog tswj. Txoj qab hlua los kuj yuav khom vam niam txiv tom no nrog hwj thiab no mog. Ob tug kwv luag, neb coj lus nraim rau niam rau txiv kom niam txiv tom no ho mam lub xeeb thiab no mog." Ob tug tshaj txaum yim liag rau ob tug mej koob hauv tsev.

Mej koob hauv tsev sawv txais yim thiab teb tias:

    "Ob tug kwv luag, wb tau niam txiv roj wb li rhais, wb tau niam txiv lus wb thiaj li hais. Niam txiv hais li no, niam txiv kuj yuav tsis kom niam txiv tom ub tuaj tim ntsej tim muag. Luag hais tias tsis thov dag thov zog ces yog dev npua zog. Thov dag thov zog ces yog nyiaj kub zog. Neb yog ob tug niam txiv tom ub thov dag thov zog. Neb lav mus rau niam txiv qhua vauv yawg los yeej tau. Hnub qab nram lub ntsis tus vauv ho coj tus ntxhais mus ua lub neej noj tsis kawg qub, haus tsis kawg ntsis. Cia niam txiv tub niam txiv ntxhais rau kab theeb tim puam, ua nas qhuav noog nkig. Coj qab zeb los niam txiv tsis pub xa rau qab zeb. Coj qab ca los niam txiv tsis pub xa rau qab ca no mog. Tsuav yog niam txiv tom ub lav nyog tsheej tab, meem nyog tsheej tim. Nws tuaj yeem nrhiav kom tau tus vauv no ib tug kwv los tuav hwj xwm niam txiv tub niam txiv ntxhais mus kom kawg qub kawg ntsis ces niam txiv tsuas muaj zoo siab xwb. Yog hais tias niam txiv tom ub tsis nrhiav ib tug los hwj xwm niam txiv tom no tus ntxhais lub neej mus kom kawg. Niam txiv tom no txawm hais tias tsis muaj khau rau los niam txiv lam nrig ib tug cwj quav suv lawv nraug vauv qab no laiv mog. Txog thaum no lawm niam txiv qhua vauv yawg tsis txhob tu siab no mog."  Sawv tsees txaum yij rau ob tug tshaj mej.

Ob tug mej koob tom ub txais yim thiab teb tias:

    "Wb meem nyog tsheej tab, lav nyog tsheej tim ntag lauj. Wb mam li coj niam txiv cov lus mus cej luam rau qhua vauv yawg tom ub thiab cov kwv tij. Hnub qab nram lub ntsis yog tus vauv no ho tsis hlub tus ntxhais. Luag hais tias nyob laus tsw paus, nyob dhuav tsw quav. Nws cia tus ntxhais noj hno ntxuag kua muag, haus dej ntxuag kua ncauj. Cia tus ntxhais rau kab theeb tim puam, ua nas qhuav noog nkig. Nws yeej tsis hlub tsis tshua tus ntxhais. Niam txiv tom ub nraug vauv yawg mam li nrhiav tus vauv ib tug kwv los tuav hwj xwm tus ntxhais lub neej mus kom kawg qub kawg ntsis. Niam txiv tom ub yeej meem nyog tsheej tab, lav nyog tsheej tim ntag no nawj." Txaum yim liag rau ob tug txum mej.

Txum mej txais yim. Ob tug txum mej hais ntxiv li no:

    "Ob tug kwv luag, yog hais tias neb meem nyog tsheej tab lav nyog tsheej tim no ces niam txiv xav kom peb haus ib lub me cawv khawm pib. Peb haus lub cawv no mas nyias nco nyias lus nawj. Hnub qab nram lub ntsis yog niam txiv tom ub tom no vam tsis txog peb plaub tug ua pov thawj los tseg. Yog niam txiv vam txog peb plaub tug, peb yuav tau ua plaub lub qhov muag nkoj ntab yuj yeev plaub ceg kaum ntuj tuaj nrog saib mog."

Plaub tug mej koob thiaj tsaws lawv plaub khob cawv los tuav ntawm tes. Ob tug tshaj mej thiaj li hais tias:

    "Wb yuav li neb hais lau, ob tug kwv luag. Hnub qab nram lub ntsis yog hais tias nkauj nyab nraug vauv txawj ua lub neej ces nyaj niam txiv yuav vam tsis txog peb plaub tug. Yog nkauj nyab nraug vauv tsis txawj ua lub neej, niam txiv vam txog peb plaub tug los peb yuav tau ua plaub lub qhov muag nkoj ntab yuj yeev plaub ceg kaum ntuj tuaj nrog saib thiab."

Plaub tug mej koob thiaj li haus ib lub cawv txum pib.

Lus Xuam - Nqe 2

Plaub tug mej koob kab txum pib meej. Ob tug tshaj mej thiaj li teev cawv rau hauv plaub lub khob. Nkawd tsaws cawv rau ob tug txum mej. Tshaj mej thiaj li ua nriav lus hais tias:

    "Ob tug kwv luag, wb txib neb tag los yuav rov txib thiab. Neb tsis txhob xav li cas. Neb mus ntxig nug rau niam txiv seb niam txiv puas tshuav lus nkhib lus nkhaus li cas. Yog niam txiv tshuav li cas niam txiv yeej meem phua plhawv los. Niam txiv tsis txhob ua kauv tshus zoov, tshws zais nas. Dub los wb yuav ntxhua kom huv. Ntuag los wb yuav ntxiv rau kom ntom. Yog hais tias niam txiv ho tsis muaj lus nkhib lus nkhaus li cas lawm los thov niam txiv muab lub peg rau wb nce. Thov niam txiv txo txoj kab tshoob kev kos rau wb taug no mog, ob tug kwv luag." Sawv tsees txaum yim rau ob tug mej koob hauv tsev.

Ob tug txum mej sawv txais yim. Nkawd coj ob tug mej koob tom ub tub cawv ib lwm. Txum mej thiaj li ua nriav lus hais tias:

    "Ob tug kwv luag, wb tau niam txiv roj wb li rhais, wb tau niam txiv lus wb thiaj li hais. Niam txiv hais ib nqe li no. Hnub niam txiv tom ub tau tuaj coj niam txiv tom no tus ntxhais. Niam thiab tus ntxhais yau yeej tau mus raws mus coj tus ntxhais kom rov qab los tsev. Niam tau mus hais tus ntxhais. Tab sis tus ntxhais tsis kam los. Niam thiab tus ntxhais yau thiaj li rov qab los tsev lawm. Thaum niam mus txog mas niam txiv tom ub nraug vauv yeej tsis pom thiab tsis paub tias yog niam li. Tej zaum yog niam txiv tom ub yeej tsis xav yuav niam txiv tom no tus ntxhais tiag. Niam txiv tom ub thiaj li txhob txwm saib tsis taus niam txiv tom no. Niam txiv tom no hais tias tsis ua li cas. Hnub no nej coj niam txiv tus tub tus ntxhais tuaj txog niam txiv lawm ces nej txawj tuaj los txawj rov no nawj mog." Ib txaum yim rau ob tug tshaj mej.

Tshaj mej thiaj li txais yim thiab teb hais tias:

    "Hais txog nqe no mas yeej muaj tseeb tiag lauj, ob tug kwv luag. Thov rau niam rau txiv ho zam ib txog kev dav pub niam txiv tom ub thiab. Tos ho tau ua siab niam li ntawd me ntsis los vim hais tias lub sib hawm ntawd txiv tseem mus ua hauj lwm lawm. Tshuav niam thiab tus hluas xwb ces nkawd tsis paub dab tsi li. Lub qe los thiaj li tsis tau muab rau niam. Tus hluas los yeej tsis pe niam thiab tus niam hluas ib pes li thiab. Niam txiv tom ub muab lus hais li no kom wb hais rau neb ob tug. Neb ho coj mus nrog chawj niam chawj txiv thiab. Neb mus nrog laj niam laj txiv thov niam txiv zam ib txog kev dav rau niam txiv tom ub thiab. Niam txiv tom ub thov lav ib lo lus tseg rau ntawd. Hnub qab nram lub ntsis niam txiv tom no rab hneev yaj kub txeeg ya tuaj ntsia ntsees niam txiv tom ub qab taw rooj. Niam txiv tom ub ho tau tuaj raws tus ntxhais li rooj no. Niam txiv tom no txawm ho tsis muaj cov thoob tsib hno xaiv, muab tsis tau lub me qe rau niam txiv los sis tsis pom niam pom txiv ib pes li. Niam txiv tom ub yuav tsis hais dab tsi thiab. Yog hnub qab nram lub ntsis tsuj tus roj tshais tus neev no. Niam txiv tom ub tseem muaj tus txhib ntag das yuav kom tau npaum ub npaum no mas thiaj li ua tshoob ua kos. Tsis ntshai, niam txiv tom ub tus coj tshoob N . . . (Hais tus coj tshoob tom ub npe) hais tsis tau nws tsev neeg. Nws mam li ua tus tso no nawj. Tsuas pub niam txiv tom no ua tshoob ua kos dawb paug xwb no nawj. Yam lub lauj kaub mas niam txiv tom no lub twb npau lawm mas niam txiv tom ub lub mam li xi no nawj mog. Ob tug kwv luag, xyuam tsis nyog neb lub laj khwv lauj mog. Neb pab coj lus mus chawj niam chawj txiv kom niam txiv ho zam ib txog kev dav thiab lauj mog. Niam txiv tom ub ces yeej pw nthi rau lub qhov txhaum ntag no nawj mog, ob tug kwv luag." Ib txaum yim rau ob mej koob hauv tsev.

Ob tug txum mej thiaj li txais yim. Nkawd thiaj li sawv mus nrog niam txiv tom no sab laj:

    "Ob tug kwv luag, neb ua siab ntev tos wb mus laj niam laj txiv seb niam txiv ho hais li cas."

Tshaj mej teb tias:

    "Neb laj khiav xwb mog ob tug kwv luag."

Mej koob hauv tsev mus nrog niam txiv sab laj tag ces nkawd thiaj li rov qab los:

    "Neb laj tos mog ob tug kwv luag."

Ob tug tshaj sawv tsees txaum yim teb tias:

    "Neb laj khiav os ob tug kwv luag."

Ob tug txum mej thiaj li hais tias:

    "Peb kab peb cov txum pib kom meej tso yuam. Wb mam li ho teev dua cawv tshiab."

Plaub tug mej koob kab plaub khob cawv meej. Mej koob hauv tsev thiaj li teev cawv rau plaub lub khob. Nkawd tsaws cawv rau ob tug tshaj mej thiab ua nriav lus tias:

    "Ob tug kwv luag, neb kom wb mus laj niam laj txiv los kuj tsis tau niam txiv ib lo lus nyiaj lus kub. Tsuas yog tau niam txiv lo lus nkhib lus nkhaus xwb mog. Niam txiv hais tias neb lav los tau. Kaj ntug tag kis niam txiv tom no ho tuaj yuav raug niam txiv tom ub ib tug ntxhais. Tsuj tus roj tshais tus neev no, niam txiv tom no muaj tus tsib meej tsib xwm ua raws li kab li kev los nws ua nws ntsej nws muag. Yog niam txiv tom no tus tsis tsib meej tsib xwm ho ua tsis raws kev raws cai, tsis muaj lub qe rau niam txiv tom ub los sis tsis pom niam txiv tom ub li. Niam txiv tom ub tus coj tshoob coj kos hais tias nws zam tau. Ces hnub no niam txiv tom no zam tau thiab. Yog niam txiv tom ub hais tias ntshe yuav muaj tus zam tsis tau no los thov niam txiv tom ub tso 12 tuaj. Hnub qab nram lub ntsis yog niam txiv tom no ho tuaj xeeb txog niam txiv tom ub. Niam txiv tom no ua tsis raws kab raws kev, ua tsis raug ntsej raug muag. Niam txiv tom no mam li tso 12 rov qab rau niam txiv tom ub nawj. Niam txiv hais li no, nej hais tias nej lav los niam txiv yeej kam. Nej hais tias cia nej tso 12 los niam txiv yeej kam tib si no nawj. Niam txiv tom no lus ces tsuas hais li no xwb. Neb ho coj lus rau niam txiv qhua vauv yawg seb nws ho xav li cas mog, ob tug kwv luag." Mej koob hauv tsev sawv tsees txaum yim.

Ob tug mej koob tom ub thiaj li sawv txais yim thiab teb li no:

    "Ob tug kwv luag, luag hais tias ib puas las nyiaj muas tsis tau niam txiv tom no ib lo lus nyiaj lus kub nog mog. Niam txiv tom no hais ces yeej yog niam txiv lus kawg. Wb nyob niam txiv tawb ces quaj xws niam txiv noog. Wb nyob niam txiv nkuaj rag xws niam txiv nees. Niam txiv tom ub hais li no, niam txiv tom ub thov lav. Kaj ntug tag kis niam txiv tom no ho muaj ib tug tub. Niam txiv tom ub muaj ib tug ntxhais. Nkawd sib qaws ua neej. Tsuj tus roj tus hneev zoo li rooj no los niam txiv tom ub yuav tsis nplua kev nplua cai dab tsi. Tab sis niam txiv tsuas lav niam txiv cuab kwv tij tus dai tus qhab tse xwb. Hnub qab nram lub ntsis niam txiv tom ub tseem muaj tus txhib ntag das tias yuav yuav 12 no los tsis ntshai. Niam txiv tom ub tus coj tshoob N . . . (Hais tus coj tshoob lub npe) hais tsis tau nws cuab kwv tij ces nws mam li tso no nawj. Tsuas pub niam txiv tom no ua tshoob ua kos dawb paug xwb. Yam lub lauj yias dej niam txiv tom no lub xub npau mas niam txiv tom ub lub mam li xi no mog." Txaum yim rau ob tug mej koob hauv tsev.

Mej koob hauv tsev txais yim thiab teb tias:

    "Tseeb yog niam txiv tom ub tseeb. Niam txiv tom ub hais tias nws lav ruaj lav qoos los niam txiv tom no kuj kam thiab. Kev neej kev tsav ces qas yi mus qas yi los. Koj qaib pw kuv cooj. Kuv os pw koj nkuaj. Niam txiv tom ub lav ib lo lus ruaj lus khov los haj yam zoo. Vim hais tias hnub no kuv sau koj ib teg noj los tag kis koj yeej yuav sau kuv ib teg noj thiab. Niam txiv tsis xav kom ua li ntawd. Kev neej kev tsav ntoj ib txhiab thuv ib txhis, niam txiv tsis xav pub kom muaj chaw tu siab no mog. Peb kab cawv kom meej tso. Neb ho muaj hauj lwm los neb ua ntxiv mus. Neb hais tias neb tsis muaj hauj lwm lawm no ces peb nrhiav chaw so mog, ob tug kwv luag."

Txheej lus no los meej rau ntawm no lawm. Plaub tug mej koob thiaj li kab lawv plaub khob cawv. Ob tug tshaj mej rov teev cawv rau hauv cov khob. Nkawd tsaws cawv rau ob tug txum mej. Ob tug tshaj mej thiaj li rov qab nug seb ua li niam txiv tom no puas tshuav lus nkhib lus nkhaus li cas:

    "Ob tug kwv luag, xyuam tsis nyog neb laj khwv lauj mog. Tav no luag hais tias lub luaj qoob tsis ua ces yuav tsis tau noj. Lub luaj tshoob tsis leg ces yuav tsis tiav. Wb khom vam neb ob tug mus ntxig noog rau niam rau txiv seb niam txiv puas tshuav lus xeej lus xuam, lus nkhib lus nkhaus thiab lus do lus dim li cas. Niam txiv tshuav li cas los thov niam txiv hais los rau wb no mog. Niam txiv tsis txhob ua kauv tshus zoov, tshws zais nas. Dub los wb yuav ntxhua kom huv. Ntuag los wb yuav ntxiv rau kom ntom. Yog hais tias niam txiv ho tsis muaj lus nkhib lus nkhaus li cas lawm los thov niam txiv muab lub peg rau wb nce. Thov niam txiv txo txoj kab tshoob kev kos rau wb taug no mog, ob tug kwv luag."  Sawv tsees txaum yim rau ob tug txum mej.

Ob tug txum mej txais yim thiab teb tias:

    "Ob tug kwv luag, niam txiv lus nkhib lus nkhaus, lus dua lus dim thiab lus xeej lus xuam ces niam txiv tsuas hais li no xwb. Txawm tshuav los niam txiv yuav tsis hais lawm. Neb muaj hauj lwm los neb ua ntxiv mus. Yog neb tsis muaj hauj lwm ces peb nrhiav chaw so xwb no mog. Wb yeej tsis daj tsis deev neb ob tug kwv luag li mog. Niam txiv tom no lus xeej lus xuam ces tsuas muaj li no xwb no mog."  Txaum yim rau ob tug tshaj mej.

Tshaj mej thiaj li txais yim thiab teb tias:

    "Yog li ces muaj lus ua niam ua txiv tsaug lauj mog, ob tug kwv luag. Ib puas las nyiaj muas tsis tau niam txiv ib lo lus nyiaj lus kub. Niam txiv muab lub peg rau wb ntoj, txo txoj kab tshoob kev kos rau wb coj. Wb muaj lus ua niam ua txiv tsaug no mog. Ib chim los sis kaj ntug tag kis niam txiv tshuav lus dab tsi ho yuav hais los niam txiv hais tau thiab no mog. Wb tshuav hauj lwm lawm tom ntej ces wb ua ntxiv mus lawm no mog."

Ob tug mej koob tom ub thiaj li pib ntos txog nqi mis nqi hno.